Gjithmonë është aty/ Natalie Harp, pushteti i heshtur pranë Donald Trumpit

Në një nga episodet më të pazakonta që tregon se deri ku ka arritur afërsia e saj me Donald Trumpin, Natalie Harp ishte e gatshme të futej në bagazhin e një makine vetëm që të mos mbetej pas autokolonës së presidentit amerikan.

Ngjarja ndodhi në tetor 2023, kur Trumpi po largohej nga Trump Tower në Nju Jork për të shkuar në gjykatë. Në hollin e ndërtesës shpërtheu një debat pasi, sipas dy burimeve të njohura me situatën, Harp këmbënguli se Trumpi i kishte kërkuar ta shoqëronte.

Problemi ishte praktik: nuk kishte më vend për të në automjetet e autokolonës.

Zgjidhja e saj ishte gjithçka tjetër veçse normale.

Harp hipi në bagazhin e një foristrade për të ndjekur presidentin.

Në pamje të parë, episodi mund të duket thjesht si një histori e pazakontë. Por për njerëzit që ndjekin nga afër rrethin e Donald Trumpit, ai tregon diçka shumë më të rëndësishme: nivelin e besnikërisë, aksesit dhe afërsisë që Natalie Harp ka ndërtuar me presidentin amerikan.

Nga televizioni konservator në krah të Trumpit

Sot 35 vjeçe, Harp nuk është një nga figurat më të njohura të administratës amerikane. Ajo nuk ka një nga postet më të fuqishme të Shtëpisë së Bardhë dhe nuk shfaqet zakonisht në listën e emrave kryesorë të administratës.

Megjithatë, prania e saj pranë Trumpit është bërë gjithnjë e më e dukshme.

Harp kishte punuar më parë si prezantuese në një rrjet televiziv konservator dhe u afrua me Trumpin pasi e kishte falënderuar publikisht, duke thënë se presidenti i kishte “shpëtuar jetën”.

Në vitin 2022 ajo iu bashkua ekipit të tij.

Që nga ai moment, ngritja e saj ishte e shpejtë.

Gjatë fushatës presidenciale të vitit 2024, Harp e shoqëroi Trumpin në udhëtime dhe tubime në të gjithë vendin. Ajo i siguronte materiale mediatike, artikuj dhe informacione që e paraqisnin presidentin në një dritë pozitive.

Puna e saj ishte aq e lidhur me printimin dhe përgatitjen e materialeve për Trumpin, sa njerëzit pranë tij nisën ta quanin me një nofkë domethënëse:

“Printerja njerëzore”.

Një kanal i drejtpërdrejtë te presidenti

Me kalimin e kohës, roli i Harpit shkoi përtej përgatitjes së materialeve.

Ajo është bërë një nga kanalet përmes të cilave mesazhe, informacione dhe kërkesa mbërrijnë te Trumpi. Ndihmon në organizimin e takimeve, përgatit materiale dhe, sipas raportimeve, shkruan ose ndihmon me postimet e presidentit në Truth Social.

Një kongresmen republikan ka treguar se Harp është bërë aq e rëndësishme në komunikimin me Trumpin, sa edhe kur ai flet drejtpërdrejt me presidentin, ajo zakonisht sigurohet të jetë në dijeni të bisedës.

Pikërisht ky akses ka bërë që Harp të jetë një figurë e veçantë brenda rrethit të presidentit.

Ajo mund të mos ketë titullin më të rëndësishëm në administratë, por duket se ka diçka që në orbitën e Trumpit shpesh vlen po aq sa një post zyrtar: besimin personal të presidentit.

Gjithmonë në sfond

Pas rikthimit të Trumpit në Shtëpinë e Bardhë, prania e Harpit u bë edhe më e dukshme.

Në pamjet nga ceremonia të ndryshme të nënshkrimit të dokumenteve presidenciale dhe nga aktivitetet në Zyrën Ovale, ajo është shfaqur shpesh në sfond, pranë presidentit.

Ajo është gjithashtu pjesë e grupit të vogël të ndihmësve që e shoqërojnë Trumpin gjatë udhëtimeve dhe tubimeve politike.

Sipas një këshilltari të Shtëpisë së Bardhë, Trumpi e vlerëson veçanërisht faktin se Harp është jashtëzakonisht besnike dhe reagon shpejt kur ai ka nevojë për diçka.

Vetë Trumpi, sipas një prej burimeve të cituara në raportime, ka vlerësuar veçanërisht shpejtësinë e saj në gjetjen dhe printimin e materialeve që i kërkon.

Por afërsia ka krijuar edhe tensione

Aksesi i pazakontë i Harpit nuk është pritur gjithmonë mirë nga të gjithë brenda ekipit presidencial.

Disa këshilltarë që kanë kërkuar takime private me Trumpin janë befasuar kur kanë zbuluar se edhe Harp ndodhej në takim.

Sipas burimeve të njohura me funksionimin e rrethit të ngushtë të Trumpit, ajo është treguar mbrojtëse ndaj aksesit të saj te presidenti.

Raportohet gjithashtu se Harp u ka thënë disa bashkëpunëtorëve se i raporton drejtpërdrejt Trumpit. Një pretendim i tillë ka shkaktuar bezdi te disa zyrtarë të tjerë të Shtëpisë së Bardhë, të cilët funksionojnë përmes strukturës zyrtare të hierarkisë presidenciale.

Por jo të gjithë e përshkruajnë situatën në këtë mënyrë.

Një zyrtar tjetër e ka minimizuar këtë perceptim, duke thënë se Harp bashkëpunon me kolegët, ndihmon në përgatitjen e materialeve dhe siguron që informacioni t’u përcillet personave përkatës.

Edhe zëdhënësi i Shtëpisë së Bardhë, Davis Ingle, e ka mbrojtur publikisht, duke e cilësuar Harpin si një nga bashkëpunëtoret “më besnike dhe më punëtore” të ekipit të Trumpit.

Emri i saj shpërthen në debat pas Jon Ossoffit

Roli i Harpit tërhoqi sërish vëmendjen publike pas një fjalimi të senatorit demokrat të Xhorxhias, Jon Ossoff.

Gjatë kritikave ndaj Trumpit, Ossoff e përmendi Harpin në mënyrë ironike, duke e futur emrin e saj në debatin politik.

Reagimi i Shtëpisë së Bardhë ishte i ashpër.

Përmendja e saj mori edhe më shumë vëmendje pasi Harp kishte qenë pjesë e grupit të vogël të personave që shoqëruan Trumpin gjatë një largimi të fshehtë me një avion më të vogël, në një situatë të tensionuar sigurie në rajon.

Brenda pak kohësh, emri i një ndihmëseje që deri atëherë ishte relativisht e panjohur për publikun u kthye në temë diskutimi në rrjetet sociale dhe në politikën amerikane.

“Baba dhe bijë”

Njerëz pranë Shtëpisë së Bardhë e kanë përshkruar marrëdhënien mes Trumpit dhe Harpit në mënyrë edhe më personale.

Një person i njohur me marrëdhënien e tyre e ka cilësuar atë si një raport “baba dhe bijë”.

Kjo afërsi shpjegon pjesërisht edhe arsyen pse Harp duket se ka mbijetuar politikisht pavarësisht shqetësimeve të disa bashkëpunëtorëve për ndikimin dhe aksesin e saj.

Pak prej tyre besojnë se vëmendja e fundit mediatike do ta dobësojë pozitën e saj pranë Trumpit.

Dyshimet për një postim kontrovers

Emri i Natalie Harpit është përmendur edhe në një tjetër episod kontrovers që lidhet me komunikimin e Trumpit