Europa në prag të një nate tjetër/ Le Pen dhe Farage, kundërsulmi i fundit 

Marine Le Pen dhe Nigel Farage, dy prej figurave më të rëndësishme të nacionalizmit europian, po dalin sërish në skenë pikërisht kur shumëkush i konsideronte politikisht të mbaruar.

Le Pen, pas betejës gjyqësore që rrezikoi kandidaturën e saj, rikthehet si pretendente për presidencën franceze të vitit 2027. Farage, i goditur nga një skandal financiar, zgjedh gjithashtu kundërsulmin: jep dorëheqjen dhe shpall rikandidimin, duke kërkuar një mandat të ri nga votuesit britanikë.

Dy historitë kanë një element të përbashkët: qëndrueshmërinë e jashtëzakonshme të sovranizmit europian. Për dekada, këto forca kanë kaluar përmes humbjeve, krizave, skandaleve dhe sulmeve politike, por kanë ruajtur një bazë elektorale të qëndrueshme.

Madje, sa herë janë shpallur të mbaruar, kanë gjetur mënyrën për t’u rigjeneruar.

Ata u goditën nga krizat e vitit 2026, nga pasojat politike të presidencës së Donald Trumpit, nga humbja e Viktor Orbánit dhe nga rikthimi i idesë së një Europe më të bashkuar. Megjithatë, Le Pen dhe Farage janë ende aty: më të dobët në disa drejtime, por politikisht të gjallë dhe agresivë.

Dhe kjo është ajo që duhet të shqetësojë Europën.

Nëse Le Pen arrin të fitojë presidencën franceze në 2027, mund të ndryshojë rrënjësisht politika europiane: nga mbështetja për Ukrainën te bashkëpunimi ushtarak, nga boshti franko-gjerman te vetë ideja e një Europe të bashkuar dhe të aftë të veprojë si fuqi globale.

Nëse, paralelisht, Farage vazhdon ngritjen e Reform UK, edhe marrëdhënia e Britanisë me Europën mund të marrë një tjetër drejtim.

Këtu qëndron paradoksi i madh: ndoshta sovranistët europianë nuk janë gjeni politikë. Ndoshta thjesht kundërshtarët e tyre nuk kanë ditur t’i mposhtin.

Sepse pas kaq shumë humbjesh të shpallura, ata janë ende në këmbë. Dhe beteja për Europën sapo ka hyrë në një fazë të re.