“Goditje e fuqishme nga Washingtoni për Beogradin”/ Koçi: Serbia nuk mund të luajë më në dy krahë

Një projektligj i ri në Kongresin amerikan po rrit ndjeshëm presionin ndaj Beogradit dhe, sipas analistit Melazim Koçi, mesazhi i tij shkon përtej kufijve të Serbisë.

Koçi e konsideron nismën e kongresmenëve Joe Wilson dhe Bill Keating si një paralajmërim të fortë politik për kursin që Serbia ka ndjekur mes Perëndimit dhe fuqive rivale të tij.

Në projektligjin “SRBIJA Act”, të paraqitur në Dhomën e Përfaqësuesve, Washingtoni vendos në qendër disa nga çështjet më të ndjeshme për Beogradin: zgjedhjet e lira dhe të ndershme, luftën kundër korrupsionit, sundimin e ligjit, lirinë e medias, por edhe marrëdhëniet e Serbisë me Rusinë, Kinën dhe Iranin.

Për Koçin, thelbi politik i këtij zhvillimi është i qartë: Serbia po vihet përballë kostos së politikës së saj të ekuilibrit mes aspiratës evropiane dhe lidhjeve të thelluara me Moskën, Pekinin dhe Teheranin.

Projektligji shkon edhe më tej, duke e lidhur vazhdimin e Dialogut Strategjik SHBA–Serbi me trajtimin konkret të këtyre çështjeve nga pala amerikane në bisedimet me Beogradin.

Sipas analizës së Koçit, kjo përbën një sinjal se Washingtoni nuk dëshiron që afrimi me Serbinë të zhvillohet duke anashkaluar problemet e demokracisë, korrupsionit apo orientimit të saj gjeopolitik.

Dhe mesazhi, sipas tij, nuk duhet lexuar vetëm në Beograd.

Ai prek të gjithë Ballkanin: SHBA kërkon një rajon të lidhur me demokracinë, sigurinë dhe strukturat euroatlantike, jo një hapësirë ku Rusia, Kina apo Irani mund të zgjerojnë ndikimin e tyre përmes aleancave politike dhe ekonomike.

Për Melazim Koçin, nisma Wilson–Keating është kështu më shumë se një projektligj për Serbinë. Është një paralajmërim për të gjithë rajonin se loja me disa qendra fuqie mund të ketë tashmë një çmim politik.