Pasi i goditi me raketa, Khamenei ndez Rajonin: Të bashkohemi, armiku i vërtetë është Amerika dhe Izraeli

Udhëheqësi suprem i Iranit, Mojtaba Khamenei, u ka bërë thirrje vendeve të Gjirit Persik të forcojnë bashkëpunimin dhe të bashkohen përballë asaj që ai e cilëson si kërcënim nga Shtetet e Bashkuara dhe Izraeli.

Në një mesazh të publikuar në Telegram me rastin e përvjetorit të lindjes së Profetit Muhamed, Khamenei kërkoi unitet politik dhe fetar mes vendeve myslimane, duke paralajmëruar se përçarjet mund të shfrytëzohen nga kundërshtarët e tyre.

Sipas tij, vendet e rajonit duhet të rrisin bashkëpunimin jo vetëm në fushën e sigurisë, por edhe në ekonomi, shkencë dhe zhvillim.

“Uniteti mysliman përballë ateizmit global është një strategji kuranore”, deklaroi Khamenei, duke u bërë thirrje qeverive të Gjirit të identifikojnë, sipas tij, “armikun e vërtetë”.

Apeli vjen në një periudhë të vështirë për Iranin, pas përplasjes me Shtetet e Bashkuara dhe Izraelin, ndërsa vendi po përballet me pasoja ekonomike, sanksione amerikane dhe vështirësi në tregti.

Ndërkohë, Teherani po forcon strukturat e sigurisë. Emërimi i figurave të Gardës Revolucionare në poste të rëndësishme është interpretuar si sinjal për një qasje më të ashpër të udhëheqjes iraniane pas humbjeve të pësuara gjatë konfliktit.

Por thirrja e Khameneit për një front të përbashkët vjen në një rajon ku disa prej vendeve të Gjirit ruajnë marrëdhënie të ngushta politike dhe të sigurisë me Washingtonin.

Për këtë arsye, apeli i Teheranit për bashkim kundër SHBA-së dhe Izraelit pritet të përballet me një reagim të kujdesshëm nga vendet arabe të Gjirit.