Veliaj nuk dorëzohet/ Avokatët nisin procedurat për Gjykatën Europiane

Avokatët e huaj të Erion Veliajt pritet ta çojnë në Gjykatën Europiane për të Drejtat e Njeriut në Strasburg çështjen që lidhet me masën e arrestit ndaj kryebashkiakut të Tiranës.

Hapi i radhës i mbrojtjes është parashikuar për 10 shtator, kur avokatët pritet të nisin procedurat për paraqitjen e ankimit në gjykatën ndërkombëtare.

Për këtë qëllim, mbrojtja ka kërkuar një takim të dytë me Erion Veliajn në ambientet e SPAK-ut, i cili është planifikuar po për datën 10 shtator. Gjatë takimit, kryebashkiaku pritet të firmosë dokumentacionin e nevojshëm për vijimin e procedurave ligjore lidhur me masën e arrestit.

Vendimi për t’iu drejtuar Strasburgut vjen pas dy vendimeve të Gjykatës Kushtetuese në favor të Veliajt, të cilat, sipas mbrojtjes, janë përfshirë në argumentimin që do t’i paraqitet gjykatës ndërkombëtare.

Ndërkohë, Gjykata e Lartë ka caktuar datën 15 shtator, në orën 09:30, për shqyrtimin e masës së sigurisë ndaj Erion Veliajt, pas rikthimit të çështjes nga Gjykata Kushtetuese.

Në këtë mënyrë, ditët e 10 dhe 15 shtatorit pritet të jenë dy momente të rëndësishme për mbrojtjen e kryebashkiakut të Tiranës, me avokatët që fillimisht synojnë të ndjekin rrugën e ankimit në Strasburg dhe më pas të përballen me shqyrtimin e masës së sigurisë në Gjykatën e Lartë.