Operacioni Carpet/ Zelensky ka gati kurthin për të gjunjëzuar Carin e Kremlinit

Lufta në Ukrainë po hyn në një fazë të re përshkallëzimi, ndërsa Kievi po shqyrton zgjerimin e operacioneve me dronë pranë aeroporteve ruse, me synimin për të penguar trafikun ajror dhe për të rritur koston ekonomike të luftës për Moskën.

Sipas Wall Street Journal, strategjia lidhet me të ashtuquajturin “Operation Carpet”, përmes të cilit Ukraina përdor dronë pranë aeroporteve ruse për të detyruar autoritetet të pezullojnë përkohësisht fluturimet për arsye sigurie.

Presidenti ukrainas Volodymyr Zelensky ka deklaruar se hapësira ajrore ruse po bëhet gjithnjë e më e pasigurt. Kievi synon gjithashtu që kompanitë ndërkombëtare ajrore të rivlerësojnë rrezikun e fluturimeve drejt Rusisë.

Sipas të dhënave të Osprey Flight Solutions, rreth 16 mijë dronë kanë hyrë në hapësirën ajrore ruse gjatë gushtit, duke shkaktuar mesatarisht mbylljen e përkohshme të dhjetëra aeroporteve çdo ditë.

Ekspertët paralajmërojnë se intensifikimi i sulmeve me dronë, së bashku me aktivitetin e mbrojtjes ajrore dhe përdorimin e gjerë të GPS spoofing, rrit rreziqet për aviacionin civil.

Moska e ka dënuar strategjinë e Kievit. Vladimir Putin e cilësoi paralajmërimin e Zelenskyt si “deklaratë terrorizmi” dhe paralajmëroi kundërpërgjigje.

Në të njëjtën kohë, Rusia ka shtuar sulmet ndaj objektivave ukrainase. Sipas Washington Post, përshkallëzimi është vërejtur edhe pas vizitës në Moskë të drejtorit të CIA-s, John Ratcliffe, i cili u kërkoi zyrtarëve rusë të riktheheshin në negociata.

Megjithatë, sipas burimeve dhe analistëve të cituar nga gazeta amerikane, Putin nuk duket i bindur për një armëpushim. Përkundrazi, ai mund të besojë se presioni ushtarak mund ta detyrojë Kievin të pranojë disa prej kërkesave të Moskës deri në dimër.

Ndërsa negociatat mbeten të pasigurta, Kievi po kërkon ta godasë Rusinë aty ku mund t’i shkaktojë kosto ekonomike, ndërsa Moska vazhdon të mbështetet te presioni ushtarak.