Balla-opozitës: Fërkoni duart nga sukseset e SPAK, por prokurorët i shani me ‘libër shtëpie’

Kryetari i grupit parlamentar të Partisë Socialiste, Taulant Balla, komentoi arrestimin e ish-drejtoreshës së SHISH, Vlora Hyseni, duke u ndalur edhe te qëndrimet e opozitës ndaj SPAK dhe reformës në drejtësi.

Balla deklaroi se PS mbështet hetimet e SPAK dhe kërkon që ato të zhvillohen pa ndikime politike. Sipas tij, i njëjti standard duhet të zbatohet edhe në rastin e Hysenit, duke theksuar se Partia Socialiste nuk merr rolin e avokatit të askujt.

“Ne mbështesim SPAK të bëjë një hetim të pandikuar. Vlerësojmë punën e bërë nga SPAK”, tha Balla.

Ai iu referua edhe opozitës, duke argumentuar se, ndërsa disa prej përfaqësuesve të saj, sipas tij, vlerësojnë rezultatet e reformës në drejtësi, kreu i opozitës, Sali Berisha, vijon të kritikojë publikisht prokurorët e SPAK.

Balla përmendi si element të rëndësishëm faktin që, sipas tij, i njëjti prokuror që po heton çështjen e Hysenit është përfshirë edhe në hetime ndaj drejtuesve të opozitës. Ai e cilësoi si të papranueshme që prokuroria të sulmohet politikisht, ndërsa njëkohësisht kërkohet që hetimet të vijojnë.

“Ne duhet t’i garantojmë mbështetjen e plotë. Nuk ofrojmë mbështetje”, u shpreh Balla, duke sqaruar se mbështetja e PS-së, sipas tij, lidhet me punën institucionale të prokurorëve dhe jo me mbrojtjen e personave nën hetim.

Një tjetër pikë ku u ndal Balla ishte përdorimi i masave të arrestit përpara një vendimi përfundimtar gjyqësor. Ai përsëriti qëndrimin se Shqipëria duhet të rishikojë praktikën e paraburgimit dhe të mos ketë kufizime të lirisë përpara vendimit të gjykatës, duke e lidhur këtë me standardet europiane.

Në vijim, Balla rikujtoi përplasjet politike që kanë shoqëruar reformën në drejtësi që prej vitit 2016. Sipas tij, PS ishte forca politike që mori angazhimin për reformën dhe votoi ndryshimet kushtetuese, ndërsa akuzoi opozitën se më pas nuk votoi ligjet që lidhen me zbatimin e saj.

Balla tha se standardi i Partisë Socialiste është të përshëndesë punën hetimore të prokurorëve të SPAK, pavarësisht personave që janë objekt i hetimeve, ndërsa përsëriti se PS nuk do të ndërhyjë në përmbajtjen e dosjeve apo në proceset gjyqësore.