Hetimi për videot intime/ 3 nga gratë e përfshira në pamje merren në pyetje, kë fajësojnë?

Ndërsa në faqe të ndryshme online vijojnë të shfaqen video me përmbajtje intime, të lidhura me kompozitorin Adrian Hila dhe artiste të ndryshme, hetimi për origjinën dhe publikimin e këtyre materialeve vijon nga autoritetet.

Sektori për Krimin Kibernetik në Policinë e Tiranës ka marrë këtë të martë në pyetje edhe tre vajza të tjera që shfaqen në videot e bëra publike. Sipas deklarimeve të tyre, ato kanë dhënë shpjegime lidhur me marrëdhëniet me kompozitorin, ndërsa kanë ngritur dyshime për përgjegjësinë e personave që kanë shpërndarë apo komentuar materialet intime.

Deri tani, hetimi nuk ka përcaktuar publikisht se kush i ka nxjerrë videot, të cilat dyshohet se janë regjistruar nga kamera sigurie. Autoritetet po verifikojnë mënyrën se si materialet kanë dalë nga burimi fillestar dhe si janë shpërndarë më pas në internet.

Në kuadër të procedimit, Policia e Tiranës ka referuar materialet në Prokurori për disa vepra penale që lidhen me privatësinë dhe të dhënat kompjuterike, përfshirë “Përgjimin e paligjshëm të të dhënave kompjuterike”, “Ndërhyrjen në të dhënat kompjuterike”, si dhe “Keqpërdorimin e pajisjeve dhe ndërhyrjen e padrejtë në jetën private”.

Hetimi vijon për të përcaktuar autorët, mënyrën e marrjes së materialeve dhe personat që kanë pasur rol në shpërndarjen e tyre.