Kurti në afatin e fundit/ Presidenti ose zgjedhje të reja?

Kryeministri në detyrë i Kosovës, Albin Kurti, ka deklaruar se zgjedhja e presidentit duhet të zgjidhet përpara se vendi të shkojë në zgjedhje të reja, ndërsa afati kushtetues për përfundimin e procesit është 6 tetori. Nëse Kuvendi nuk arrin të zgjedhë presidentin, parashikohet shpërndarja e tij dhe zhvillimi i zgjedhjeve të reja brenda 45 ditësh.

Kurti tha se pa një president të zgjedhur, Kosova mund të hyjë në një tjetër proces zgjedhor, ndërsa çështja e ndryshimeve në ligjin për Dhomat e Specializuara kërkon kohë për t’u shqyrtuar. “Gjëja e parë që duhet ta bëjmë është heqja e pengesave që kemi mes nesh, e kjo është çështja e presidentit”, deklaroi ai.

Kryeministri në detyrë paralajmëroi se nëse presidenti nuk zgjidhet, vendi mund të shkojë drejt zgjedhjeve të reja, duke argumentuar se një proces i tillë nuk do të zgjidhte domosdoshmërisht ngërçin aktual.

Pjesë e përplasjes politike është edhe rendi i veprimeve për ligjin mbi Dhomat e Specializuara. PDK-ja ka kërkuar që ndryshimet në ligj të miratohen fillimisht në të dyja leximet dhe më pas të procedohet me zgjedhjen e presidentit. Në anën tjetër, Kurti ka kërkuar që fillimisht të zgjidhet presidenti dhe më pas të vijojë procedura për ligjin.

Duke iu referuar kryetarit të PDK-së, Bedri Hamza, Kurti tha se ai ka refuzuar takimin dhe se sipas tij nuk mund të arrihet marrëveshje pa dialog. “Si mund të kërkohet marrëveshje pa takim?”, tha Kurti.

Ai përmendi një sërë votimesh dhe veprimesh të mëparshme që, sipas tij, dëshmojnë bashkëpunimin e Vetëvendosjes me PDK-në, ndërsa kritikoi kërkesën që deputetët e PDK-së të mbështesin zgjedhjen e presidentit pa një marrëveshje paraprake.

“Kërkojnë nga Vetëvendosje 34 vota blanko e ata vetë nuk janë as sa gjysma e Vetëvendosjes”, deklaroi Kurti.

Në përfundim, kryeministri në detyrë tha se Kuvendi përballet me dy çështje konkrete: zgjedhjen e presidentit dhe votimin e ligjit për Dhomat e Specializuara. Ndërkohë, takimet mes Kurtit dhe Hamzës nuk kanë prodhuar ende një marrëveshje për rendin e veprimeve, ndërsa afati për zgjedhjen e presidentit është në përfundim.