Antoneta Sevdari dhe Afërdita Ndoj zgjidhen anëtare të KLP-së

Prokuroret Antoneta Sevdari dhe Afërdita Ndoj janë zgjedhur anëtare të Këshillit të Lartë të Prokurorisë (KLP).

Zgjedhjet u zhvilluan gjatë mbledhjes së Këshillit në ambientet e Polit të Drejtësisë, pas një procesi që ishte bllokuar prej javësh për shkak të kërkesave të ndërsjella për përjashtimin e anëtarëve nga vendimmarrja.

Më 8 tetor 2026, KLP rrëzoi me shumicë votash kërkesat për përjashtimin e anëtarëve, duke i hapur rrugë vijimit të procesit të zgjedhjeve.

Në garë për vendet e përfaqësimit të prokurorisë janë pesë kandidatë: Adnan Xholi, prokuror i SPAK; Arta Marku, ish-Prokurore e Përgjithshme e Përkohshme; Fatjona Memçaj, prokurore në Eurojust; Rovena Zoto, prokurore në Tiranë; dhe Ylli Pjetërnikaj, pedagog dhe prokuror.

Antoneta Sevdari është rikthyer në sistemin e drejtësisë pas një beteje ligjore që përfundoi në favor të saj. Në dhjetor të vitit 2022, Gjykata Evropiane e të Drejtave të Njeriut pranoi ankesën e saj, duke e konsideruar shkarkimin nga detyra të pajustifikuar dhe disproporcional me qëllimin e ligjit të vetingut. Pas procedurave të mëtejshme gjyqësore, Kolegji i Posaçëm i Apelimit vendosi rikthimin e saj në detyrë.

Zgjedhja e Sevdarit dhe Ndojt vjen në kuadër të ndryshimeve në përbërjen e Këshillit të Lartë të Prokurorisë, organit që luan rol të rëndësishëm në qeverisjen e sistemit të prokurorisë në Shqipëri.