Salianji trondit politikën: Rama dhe Berisha në aleancë të heshtur?

Ish-deputeti Ervin Salianji ka komentuar për median Middle East Eye protestat kundër qeverisë shqiptare, duke pretenduar se pakënaqësia e qytetarëve nuk drejtohet vetëm ndaj kryeministrit Edi Rama, por edhe ndaj kreut të Partisë Demokratike, Sali Berisha.

Sipas Salianjit, mes Ramës dhe Berishës ekziston një aleancë e heshtur, e cila, sipas tij, reflektohet në mënyrën se si kontrollohet përzgjedhja e kandidatëve brenda partive. Ai pretendon se vendimmarrja për kandidaturat nuk u lihet votuesve, ndërsa përfitimet ekonomike përqendrohen te një grup i kufizuar njerëzish.

“Këto protesta nuk drejtohen vetëm kundër qeverisë, por edhe kundër liderit të Partisë Demokratike të opozitës, Sali Berishës, i cili ka hyrë në një aleancë të heshtur me Ramën. Të dy kontrollojnë tani se kush mund të kandidojë në zgjedhjet e partive të tyre përkatëse, dhe jo votuesit, ndërkohë që një grusht njerëzish pasurohen në mënyrë marramendëse”, deklaroi Salianji.

Duke folur për kërkesat e protestuesve, ish-deputeti tha se qytetarët duan të kenë më shumë rol në vendimmarrjen politike dhe në mënyrën se si drejtohet vendi. “Njerëzit duan të përfshihen në vendimmarrjen për mënyrën se si drejtohet shteti”, u shpreh ai.

Salianji komentoi edhe zhvillimet e fundit të protestave, duke akuzuar kryeministrin Rama se ka ushtruar presion ndaj studentëve, mësuesve dhe punonjësve publikë që marrin pjesë në tubime. Ai pretendoi gjithashtu se efektivëve të policisë u është ofruar një bonus prej më shumë se 2 mijë eurosh për dhunën e ushtruar gjatë protestave. Këto deklarata janë akuza të bëra nga Salianji në intervistën për median ndërkombëtare.