Autobusi i shkollës përplaset me trenin, 4 viktima mes tyre dy fëmijë

Si pasojë e përplasjes humbën jetën katër persona, mes tyre dy fëmijë të moshës 12 dhe 15 vjeç.

Sipas autoriteteve belge, viktimat janë shoferi 49-vjeçar i autobusit, një shoqëruese 27-vjeçare dhe dy adoleshentët. Ndërkohë, pesë fëmijë të tjerë u transportuan në spital dhe mësohet se gjendja e tyre është e stabilizuar.

Aksidenti ndodhi mëngjesin e së martës, më 26 maj, rreth orës 08:10, në kryqëzimin e Stationsstraat dhe Vierhuizen. Sipas hetimeve paraprake, minibusi po vinte nga Kerkhofstraat dhe, gjatë kthimit majtas drejt Vierhuizen, doli mbi shinat e trenit edhe pse kalimi hekurudhor ishte i mbyllur. Në ato momente, autobusi u godit nga treni pasagjerësh.

Në mjet ndodheshin shtatë nxënës të shkollës së mesme të arsimit special, një ndihmëse dhe shoferi.

Zëdhënësja e prokurorisë, Lisa De Wild, deklaroi se është hapur një hetim për të zbardhur rrethanat e aksidentit. “Kemi emëruar një ekspert trafiku për të përcaktuar shkaqet e aksidentit”, tha ajo gjatë një konference për shtyp.

Edhe ministri federal i Lëvizshmërisë, Jean-Luc Crook, konfirmoi bilancin tragjik të ngjarjes, ndërsa autoritetet vijojnë hetimet për të kuptuar se si autobusi përfundoi në shina pavarësisht sinjalistikës së mbyllur.