Baton Haxhiu: SPAK është aleat i protestës dhe protesta produkt i saj

Analisti Baton Haxhiu ka komentuar protestën qytetare, duke e lidhur ndikimin e saj me hetimet dhe dosjet e SPAK-ut.

Sipas Haxhiut, pakënaqësia e qytetarëve ndaj sistemit është ndërthurur me informacionet që kanë dalë nga hetimet e SPAK-ut, duke krijuar një klimë të re në shoqëri.

Ai e cilëson SPAK-un si një “aleat” të protestës dhe argumenton se hetimet e tij kanë ndikuar në krijimin e pakënaqësisë dhe revoltës qytetare.

“SPAK-u është aleat i protestës dhe protesta është produkti i saj në një farë mënyre”, u shpreh Haxhiu, duke shtuar se publikimi dhe leximi i dosjeve të hetimeve ka bërë që qytetarët të njihen me raste dhe figura që më parë, sipas tij, konsideroheshin të paprekshme.

Sipas analistit, kjo situatë ka prodhuar dy reagime të rëndësishme: frikë tek pushteti dhe opozita, por edhe mungesë frike tek protestuesit.

Haxhiu vlerëson se protesta ka ndikuar si në Partinë Socialiste, ashtu edhe në Partinë Demokratike, duke i detyruar të dyja kampet të reflektojnë mbi situatën politike.

“Ajo që ka arritur protesta është që e ka ndërgjegjësuar edhe Partinë Socialiste, e ka ndërgjegjësuar edhe Partinë Demokratike”, deklaroi ai.

Megjithatë, analisti thekson se kohëzgjatja e protestës nuk është e mjaftueshme për të sjellë automatikisht ndryshimin e qeverisë apo të sistemit politik.

Sipas tij, protesta mund të ketë krijuar ndërgjegjësim dhe presion publik, por përtej kësaj nevojitet një proces politik që të prodhojë ndryshim konkret.

Haxhiu e lidh qëndrueshmërinë e protestës edhe me rolin e SPAK-ut, duke argumentuar se hetimet kanë prekur persona dhe struktura që më parë perceptoheshin si të paprekshme.

“SPAK-u ka prekur të paprekshmen”, tha ai, duke e cilësuar këtë si një prej faktorëve që ka ndikuar në krijimin e një ndjenje frike te elitat dhe në të njëjtën kohë të një mungese frike te qytetarët që protestojnë.

Në përfundim, Haxhiu argumenton se ndikimi kryesor i protestës deri tani nuk është ndryshimi i menjëhershëm i qeverisë, por ndërgjegjësimi i shoqërisë dhe presioni i krijuar mbi të dy kampet politike.