BE ngre shqetësime për ndryshimet në ligjin për portet turistike

Delegacioni i Bashkimi Evropian në Tiranë ka reaguar pas miratimit në Kuvend të ndryshimeve në ligjin “Për portet turistike në Republikën e Shqipërisë”, duke theksuar nevojën për një vlerësim të detajuar të tyre në raport me standardet evropiane.
Në deklaratë, BE bën të ditur se ndryshimet do të shqyrtohen nga afër nga shërbimet përkatëse, me fokus të veçantë në fushën e prokurimit publik dhe në përputhshmërinë me legjislacionin e BE-së, i cili kërkon procedura transparente dhe konkurruese për dhënien e koncesioneve, përfshirë edhe ato për portet turistike.
Në reagim theksohet gjithashtu se në tekstin e ri janë përfshirë dispozita që lidhen me ligjin për “Investitorët Strategjikë”, një akt ligjor që Shqipëria është angazhuar ta shfuqizojë në kuadër të procesit të integrimit evropian dhe reformave të kërkuara për përmbylljen e Kapitullit 27.
BE nënvizon se Shqipëria duhet të shmangë çdo hap që bie ndesh me këto angazhime, duke lënë të kuptohet se çdo devijim nga ky kurs mund të ndikojë në procesin e përafrimit me standardet e unionit.
Ligji për portet turistike kaloi me shumicë të thjeshtë, përmes 76 votave të mazhorancës në Kuvend.

Më parë, deputetja e Partisë Demokratike, Ina Zhupa, ka paralajmëruar dërgimin në Gjykatën Kushtetuese të projektligjit për ndryshimet në ligjin “Për portet turistike”, duke e konsideruar atë të papajtueshëm me parimet kushtetuese dhe interesin publik.
Sipas saj, drafti i ri favorizon “Investitorët Strategjikë” duke i përjashtuar nga procedurat e tenderimit publik dhe duke krijuar mundësi për menaxhim afatgjatë të porteve turistike pa konkurrencë. Në sistemin aktual, ndërtimi dhe administrimi i porteve realizohet përmes koncesioneve me afat të kufizuar dhe rikthim të pronës shtetit.
Zhupa argumenton se ndryshimet cenojnë sigurinë juridike, barazinë para ligjit, konkurrencën e lirë dhe transparencën në administrimin e pasurive publike, ndërsa paralajmëron se ato mund të krijojnë hapësira për marrëveshje direkte me Qeverinë.
Opozita ka bërë të ditur se përveç kontrollit kushtetues, do të ndjekë çështjen edhe në nivel ndërkombëtar, përfshirë informimin e Bashkimi Evropian, duke e lidhur debatin me standardet e prokurimit publik dhe konkurrencës së ndershme në procesin e integrimit evropian.
Mesazh për standardet e integrimit
Qëndrimi i Delegacionit të BE-së vjen në një moment kur reforma ligjore në fushën e investimeve dhe infrastrukturës turistike është në fokus të debatit publik dhe institucional në vend.
Në thelb, mesazhi i Brukselit është i drejtpërdrejtë: çdo ndryshim ligjor në fusha të ndjeshme si koncesionet dhe investimet strategjike duhet të garantojë transparencë, konkurrencë dhe përputhje të plotë me acquis communautaire – bazën ligjore të Bashkimit Evropian.
Në këtë kontekst, vlerësimi i ndryshimeve në ligjin për portet turistike shihet si një test i rëndësishëm për harmonizimin e mëtejshëm të legjislacionit shqiptar me atë evropian në procesin e anëtarësimit.