Çfarë fshihet tek Ura e Bahcallekut Shkodër? Afati kaloi, ura ende në themele

Rreth 8.4 milionë euro pa TVSH është vlera e kontratës për rikonstruksionin e segmentit Kthesa e Bërdicës – Ura e Bahçallëkut, një nga hyrjet kryesore të Shkodrës.

Projekti parashikon zgjerimin e rrugës në 4 korsi dhe ndërtimin e një ure të re paralele mbi lumin Drin.

Kontrata është fituar nga bashkimi i kompanive Kupa – AL-ASFALT – Sireta 2F.

Por problemi është afati.

Sipas të dhënave të publikuara për kontratën, punimet duhej të përfundonin më 10 qershor 2026.

Pamjet e fundit të datës 28 gusht tregojnë se ura vazhdon ende në fazën e pilotave dhe mbështetëseve.

Pra, afro 80 ditë pas afatit të parashikuar, projekti nuk ka përfunduar.

Ndërkohë, në të njëjtën zonë është hapur edhe një tjetër tender publik me fond rreth 242.8 milionë lekë, këtë herë për mbrojtjen e bregut të Drinit nga gërryerjet në Bahçallëk.

Kemi kështu dy shifra:

8.4 milionë euro për rrugën dhe urën.

242.8 milionë lekë të tjera për ndërhyrjen në bregun e Drinit.

Vonesa e projektit nuk provon automatikisht abuzim, por ngre një çështje konkrete:

A është shtyrë zyrtarisht afati i kontratës dhe a ka sjellë vonesa kosto shtesë për buxhetin?

Sepse për një projekt multimilionësh, afati është pjesë e kontratës po aq sa edhe çmimi.