Çfarë po kurdis Rama? Mbledh qeverinë një ditë para takimit me kupolën socialiste

Mbledhja e ekzekutivit ka nisur prej orës 10:00. Takimi vjen një ditë para mbledhjes së thirrur nga Rama me ministrat dhe drejtuesit politikë të PS-së, ndërsa në fokus pritet të jetë edhe organizimi në terren për zgjedhjet lokale të vitit 2027.

Kryeministri Edi Rama ka mbledhur sot ekzekutivin, në një takim që ka nisur prej orës 10:00. Deri tani nuk ka një njoftim zyrtar nëse ministrat do të kenë komunikime me mediat pas përfundimit të mbledhjes apo nëse do të bëhen publike vendimet e marra.

Mbledhja e qeverisë zhvillohet një ditë para takimit që kryesocialisti Edi Rama ka thirrur me ministrat dhe drejtuesit politikë të Partisë Socialiste, i parashikuar për pasditen e nesërme në selinë e PS-së.

Takimi i së premtes pritet të fokusohet te organizimi politik në terren dhe udhëzimet që drejtuesit politikë do t’u përcjellin strukturave socialiste në zonat elektorale që mbulojnë.

Në kuadër të përgatitjeve për zgjedhjet lokale të vitit 2027, drejtuesit politikë pritet të nisin takimet me strukturat në qarqet e tyre, ku do të prezantohen dhe shpjegohen dokumentet strategjike të mazhorancës, “Besa” dhe “Prania Besnike”.

Lëvizjet e socialistëve vijnë në një fazë të hershme të organizimit për zgjedhjet e ardhshme lokale, ndërsa Rama pritet të mbledhë edhe Asamblenë e Partisë Socialiste në javën e parë të shtatorit.

Kështu, krahas axhendës qeverisëse, PS po intensifikon organizimin e brendshëm dhe punën me strukturat në terren, duke nisur përgatitjet për garën elektorale të vitit 2027.