Daçiç sfidon sërish Kosovën: Epo, unë guxoj! Prizreni ishte kryeqyteti i parë serb!

Ministri i Brendshëm i Serbisë dhe njëkohësisht zv.kryeministri, Ivica Daçiç, ka përsëritur pretendimet politike të Beogradit për Kosovën, gjatë një tubimi elektoral në Beograd. Në fjalimin e tij, ai deklaroi se Prizreni kishte qenë kryeqyteti i parë serb rreth tetë shekuj më parë, ndërsa ritheksoi kundërshtimin e tij ndaj pavarësisë së Kosovës.

Daçiç iu përgjigj edhe kritikave që, sipas tij, i kishte drejtuar ish-ministri gjerman Michael Roth për deklaratën se flamuri serb do të valëvitej sërish në Prizren.
“Si guxon Daçiç të thotë diçka të tillë? Epo, unë guxoj! Ne jemi ndryshe nga të tjerët. Guxojmë, sepse kështu mendojmë dhe sepse Kosovën e Metohinë i kemi mbrojtur me luftë”, deklaroi politikani serb.

Duke iu referuar lidhjeve të tij me Prizrenin, ku tha se kishte lindur, Daçiç përmendi edhe numrin e serbëve që, sipas tij, jetojnë aktualisht në qytet. Ai pretendoi se sot atje jetojnë më shumë se 20 serbë, ndërsa rreth 30 vjet më parë numri i tyre ishte mbi 10 mijë.

“Tetë shekuj më parë, aty ndodhej kryeqyteti i parë serb. Nuk ka pse të ndodhë nesër, por do të ndodhë ashtu siç kemi bërë edhe më parë”, u shpreh Daçiç, duke përsëritur pretendimet e tij për të ardhmen e Kosovës.

Gjatë fjalimit, ai e cilësoi Kosovën dhe Metohinë si pjesë të pandashme të Serbisë dhe deklaroi se Beogradi nuk do të heqë dorë nga kjo çështje. Daçiç vlerësoi gjithashtu ish-presidentin serb Slobodan Millosheviç, të cilit i atribuoi rikthimin e krenarisë kombëtare serbe.

Një tjetër pjesë e deklaratave të tij iu kushtua marrëdhënieve me Rusinë dhe Kinën, të cilat i paraqiti si aleate të Serbisë në kundërshtimin e pavarësisë së Kosovës.

Daçiç pretendoi gjithashtu se kishte kontribuar në tërheqjen e njohjes së Kosovës nga më shumë se 20 shtete dhe paralajmëroi se kjo politikë mund të vijojë.

“Unë ndihmova më shumë se 20 vende të tërheqin njohjen e tyre për pavarësinë e të ashtuquajturës Kosovë. Nëse ne jemi faktor, do të vazhdojmë me atë politikë”, deklaroi ai.

Deklaratat e Daçiçit vijnë në kuadër të qëndrimit të vazhdueshëm të Serbisë kundër pavarësisë së Kosovës, ndërsa pretendimet e tij për Prizrenin dhe tërheqjen e njohjeve u paraqitën pa dokumentacion mbështetës në materialin e publikuar.