Dritan Demiraj: Protesta do të prodhojë një kastë të re politike

Kolonel Dritan Demiraj e cilësoi protestën që ka shpërthyer në Tiranë si një revoltë të gjerë qytetare kundër klasës politike. I ftuar në emisionin “Jashtë Kontrollit” në NTV, Demiraj tha se protestuesit po japin një mesazh të qartë refuzimi ndaj mënyrës se si është qeverisur Shqipëria.
Sipas tij, protesta përfaqëson pakënaqësinë e grumbulluar të një pjese të madhe të shoqërisë shqiptare dhe mund të shërbejë si pikënisje për ndryshime të rëndësishme politike në vend.
“Shpresoj dhe besoj që kjo protestë do të prodhojë lëvizje të forta dhe krijimin e një klase të re politike që do të jetë në gjendje të çojë përpara misionin e integrimit të Shqipërisë në Bashkimin Europian”, deklaroi Demiraj.
Ai u shpreh skeptik ndaj pretendimeve të qeverisë për progresin drejt anëtarësimit në Bashkimin Europian, duke argumentuar se vendi vazhdon të përballet me probleme serioze që lidhen me funksionimin e demokracisë dhe shtetit të së drejtës.
Sipas Demirajt, protestat janë pasojë e një sistemi politik që nuk ka arritur të garantojë pluralizëm të plotë politik, institucione të pavarura dhe luftë efektive kundër korrupsionit dhe krimit të organizuar.
Koloneli theksoi se energjia dhe pjesëmarrja e lartë qytetare në protestë tregojnë se një pjesë e konsiderueshme e shoqërisë shqiptare kërkon ndryshim të thellë politik, institucional dhe demokratik.
“Kur qytetarët dalin masivisht në rrugë, ata po japin një sinjal se kërkojnë një kurs të ri për vendin”, u shpreh Demiraj, duke e konsideruar protestën si një moment të rëndësishëm për të ardhmen politike të Shqipërisë.