Durrësi tronditet nga shpërthimet/ Panik te banorët, kush ishin shenjestra

Dy shpërthime me lëndë eksplozive kanë tronditur Durrësin në orët e para të mëngjesit, duke shkaktuar dëme materiale dhe alarm te banorët.

Shpërthimi i parë u regjistrua rreth orës 03:50 në lagjen nr. 11, pranë Mauzoleumit të Dëshmorëve.

Lënda plasëse u hodh në derën e jashtme të një lokali në pronësi të Gëzim Kajnos, duke shkaktuar dëme të lehta materiale.

Kajno ishte dënuar me 10 vite burg për vrasjen me armë të Asllan Kërtushës, ngjarje e ndodhur në vitin 2016, pranë lokalit të tij.

Ai u arrestua sërish në vitin 2024, pasi rezultonte se kishte ende vite dënimi për të vuajtur.

Pas përfundimit të dënimit, Kajno kishte nisur sërish aktivitetin në një bar-kafe.

Policia po heton nëse shpërthimi lidhet me të kaluarën e tij kriminale apo me ndonjë konflikt tjetër.

Rreth 40 minuta më vonë, në orën 04:30, një tjetër shpërthim ndodhi në zonën e Shkallnurit, në anë të rrugës Plepa–Ndroq.

Sasia e lëndës plasëse ishte hedhur në derën e garazhit të një automjeti dhe shkaktoi dëme materiale.

Grupet hetimore, nën drejtimin e Prokurorisë, po mbledhin provat për të zbardhur rrethanat e dy ngjarjeve dhe për të identifikuar autorin ose autorët.

Hetuesit po verifikojnë gjithashtu nëse dy shpërthimet kanë lidhje me njëri-tjetrin.

GEZIM KAJNO – FOTO