Kryeministër i Serbisë, Millosh Vuçeviç, ka reaguar pasi janë mbyllur gjashtë degë të Bankës Postare të Kursimeve të Serbisë në Veri të Kosovës, për shkak të dyshimit se kanë zhvilluar veprimtari të kundërligjshme.

“I dëshpëruar për shkak të dështimit për t’u anëtarësuar në Këshillin e Evropës, Albin Kurti ka vendosur për një akt të ri egërsie që kërcënon drejtpërdrejt mbijetesën e popullit serb në Kosovë” – ka shkruar kryeministri serb në rrjetin e tij social Instagram duke shtruar pyetjet: – “Pse serbët e Kosovës janë komuniteti i vetëm në Evropë që nuk mund të bëjë biznes normalisht? A kanë serbët e Kosovës të drejtë në paga dhe pensione?”

“Këto nuk janë pyetje për ekstremistin Kurti. Ne e dimë qëndrimin e tij. Këto janë pyetje për komunitetin ndërkombëtar, i cili nuk reagon ndaj veprimeve të Kurtit për një kohë të gjatë” – ka theksuar Vucevic

Ndërkaq drejtori i të ashtuquajturës Zyrë për Kosovën në Qeverinë e Serbisë, Petar Petkoviç, ka thënë se vendosja e Policisë së Kosovës në degët e Bankës Postare të Kursimeve, është ‘një akt tjetër i dhunshëm i shfuqizimit të institucioneve serbe në veri dhe i dëbimit të popullit serb’.

Petkoviç shtoi se ”është e qartë se ”piromani ballkanas Albin Kurti” dëshiron luftë dhe vuajtje të popullit serb, sepse gjithçka që ka bërë në muajt e fundit, po e bën ekskluzivisht për hir të dëbimit të serbëve nga territori i Kosovës”.

Ai ka paralajmëruar gjithashtu se do të bisedojë me të dërguarin e BE-së për dialog, Miroslav Lajçak, dhe se do të ftojë edhe përfaqësuesit e QUINT-it dhe do t’i informojë të gjithë në skenën ndërkombëtare për paligjshmërinë dhe “terrorin e Kurtit”.

“Ky nuk është një veprim i ri në përshkallëzim. Është një sulm i dhunshëm ndaj vetë dialogut, sepse çështja e dinarit është bërë pjesë integrale e dialogut. Por Albin Kurti po e shkatërron atë” – ka potencuar Petkovic

Para disa ditësh shefat e shtetit e kryeministrat e vendeve të Ballkanit Perëndimor u mblodhën në Kotor të Malit të Zi. Nga gjashtë vende të këtij rajoni tri prej tyre u përfaqësuan nga kryeministra me kombësi shqiptare, Edi Rama kryeministër i Shqipërisë, Albin Kurti kryeministër i Kosovës, dhe Talat Xhaferi kryeministër i Maqedonisë së Veriut.

Por nga pamjet që u publikuan nga Kotori, ra në sy sjellja aspak e hijshme që Edi Rama kishte ndaj Albin Kurtit, gjë e cila u kritikua ashpër nga opinioni publik.

E në një prononcim profesori i marrëdhënieve ndërkombëtare, Enver Bytyçi, tha se Edi Rama edhe njëherë haptas shprehu mospajtimet që ka me Albin Kurtin.

“Kryeministri Rama dhe kryeministri Kurti u shfaqën dukshëm me qëndrime të kundërta dhe me marrëdhënie ftohtësie midis tyre. Një video virale tregoi se si zoti Rama e injoroi prezencën e Kurtit në samit. Ndërsa gjithë pjesëmarrësit e tjerë, përfshirë dhe ndihmës sekretarin e Shtetit Amerikan, O’Brien, ngrihen në respekt të kryeministrit të Kosovës dhe bisedojnë me të njerëzisht, Edi Rama i jep ulur dorën homologut të tij nga Kosova. Ishte injorim total. Ishte një ndjenjë dhe shenjë se Rama nuk pajtohet me Kurtin. Ishte një demonstrim pakënaqësie për qëndrimet e Kurtit në mbrojtje të Kosovës dhe sovranitetit të saj” – ka deklaruar Bytyci

Sipas tij, afrimiteti i Ramës me Vuçiçin ishte dukshëm ndryshe.

“Miqësor, në përqafim të përhershëm. Te kënaqur dhe madje entuziast të dy bashkë. Është e vërtetë se Kurti nuk i është përgjigjur sjelljeve dhe qëndrimeve të Edi Ramës për Kosovën. Ai ishte kundër të gjitha nismave Rama-Vuçic. Nuk është pajtuar me kërkesat e kryeministrit të Shqipërisë për të bërë kompromise për asociacionin. Kurti eshte trishtuar për deklaratën e Ramës se “Veriu i Kosovës është tokë e askujt”, menjëherë pas aktit terrorist të Banjskës më 24 shtator 2023” – ka kujtuar analisti politik.

Bytyçi madje tha se Albin Kurti ishte ai që i prishi planet e Vucicit me Ramën dhe se ky I fundit, sic u shpreh ai, “Ka vënë gjithë altoporlantët e medias së tij qe ta paraqesë kryeministrin Kurti si shkaktarin e “përçarjes” së shqiptarëve në Maqedoni. Por aty nuk kishte përçarje. Pjesa pro-Kosovës thjesht iu kundërvu pjesës pro Open Balkan-it serb. Kjo ishte e domosdoshme. Nëse bashkimi bëhet duke i hap rrugë hegjemonisë serbe në rajonin tonë, atëherë ky bashkim nuk është bashkim i shqiptarëve, por bashkimi i shqiptarëve me serbët kundër vetvetes! Këtë kërkon Edi Rama, per te cilin, nëse nuk ndodh kjo, atëherë kundërshtarët e tij konsiderohen përçarës”.

Zyrtarët në Serbi kanë dënuar aksionin e Policisë së Kosovës ndaj objekteve të Bankës Postare Kursimore të Serbisë në Kosovë.

Gjatë aksionit të 20 majit, Policia e Kosovës tha se mbylli gjashtë objekte të Banës Postare Kursimore, pasi sipas saj, ato vepronin paligjshëm në veri të vendit.

Kryeministri i Serbisë, Millosh Vuçeviq, e cilësoi aksionin si “akt barbar që drejtpërdrejt kërcënon mbijetesën e popullit serb” në Kosovë.

“Kujt dhe pse po iu pengon Banka Postare Kursimore? Për shkak të çekut. Serbët në Kosovë janë komuniteti i vetëm në Evropë që nuk mund të operojnë normalisht. A kanë të drejtë ata që të kenë paga dhe pensione? Apo asgjë nuk iu lejohet”, tha Vuçeviq, sipas një njoftimi të Qeverisë serbe.

Policia e Kosovës gjatë aksionit në Mitrovicë të Veriut më 20 maj 2024.

Në njoftim u tha se këto pyetje nuk i janë drejtuar kryeministrit të Kosovës, Albin Kurti, por komunitetit ndërkombëtar.

Ndërkaq, ministri i Brendshëm i Serbisë, Ivica Daçiq, në reagimin e tij për këtë aksion, tha se kryeministri Kurti vazhdon “me terror ndaj popullit serb” në Kosovë, duke kryer “bastisje në degët e Bankës Postare Kursimore”.

Ai shtoi se “kjo çon në konflikte të reja në Ballkan, me pasoja të pallogaritshme”.

Për aksionit e 20 majit reagoi edhe Zyra për Kosovën në Qeverinë serbe. Kjo zyre pretendoi se gjatë aksionit, Policia e Kosovës ka “keqtrajtuar” punonjësit e institucioneve serbe.

“Është shqetësues fakti që pjesëtarët e EULEX-it dhe KFOR-it ishin vëzhgues të heshtur të aksionit të sotëm të paligjshëm dhe të dhunshëm në veri të Kosovës. U bëjmë thirrje përfaqësuesve ndërkombëtarë që urgjentisht të ndalojnë Kurtin dhe të mbrojnë paqen dhe popullin serb në Kosovë”, u tha në reagim.

Policia e Kosovës tha se aksioni në veri të Kosovës u krye pas raportimeve të institucioneve monitoruese financiare, sikurse njësia e inteligjencës financiare dhe Banka Qendrore e Kosovës, së bashku me Administratën Tatimore të Kosovës.

Ky institucion nuk raportoi për ndonjë incident gjatë aksionit, në të cilin u panë edhe pjesëtarë të Misionit të Bashkimit Evropian për Sundim të Ligjit në Kosovë (EULEX) dhe ata të misionit paqeruajtës të NATO-s në Kosovë, KFOR, janë parë duke marrë pjesë në aksionin në veri.

Aksioni i autoriteteve të Kosovës, vjen një javë pasi Banka Qendrore e Kosovës njoftoi se ka përfunduar afati tranzitor për rregulloren e saj, që ndalon përdorimin e dinarit serb për kryerjen e pagesave.

Rregullorja e BQK-së, që parasheh euron si monedhën e vetme për kryerjen e pagesave, është kundërshtuar fuqishëm nga Serbia.

Serbia ndan ndihmë në vlerë të miliona eurove për serbët në Kosovë, të cilëve ua paguan rrogat, pensionet dhe ndihmën shtesë, në valutën serbe, dinar.

BQK-ja ka thënë më 13 maj se pas përmbylljes së periudhës transitore i ka licencuar tetë degë të institucioneve financiare në komunat me shumicë serbe, në Leposaviq, Zveçan, Graçanicë, Shtërpcë dhe një në Shillovë të Gjilanit.

Komuniteti ndërkombëtar i ka kërkuar Kosovës që të shtyjë zbatimin e rregullores së BQK-së, duke u thirrur në ndikimin që mund të ketë te komuniteti serb në Kosovë, që pranon pagesa të ndryshme në dinarë nga buxheti i Serbisë./ REL

Themelimi i Asociacionit të komunave me shumicë serbe vazhdon të jetë kërkesë e vazhdueshme e Bashkimit Evropian ndaj Kosovës dhe që u bë edhe më e zëshme, si kushtëzim për t’u anëtarësuar në Këshillin e Evropës.

E sipas profesorit amerikan të Marrëdhënieve Ndërkombëtare, Charles Kupchan nisma për themelimin e Asociacionit, është e rëndë për Qeverinë kosovare.

“Mendoj që vendimi për përgatitje dhe implementimin e Asociacionit është vendim i rëndë dhe i dhimbshëm për qeverinë e Kosovës. Është siç themi ne në SHBA, sikur të nxjerrësh dhëmbin. Është i dhimbshëm, njerëzit nuk duan ta bëjnë. Ajo çfarë shohim ne këtu, është se BE-ja ne pergjithesi dhe Këshilli i Evropës ne veçnati po krijojnë nxitje për të implementuar vendime të rënda, duke ofruar leva politike, që Albin Kurti të thotë: Nëse duam të pranohemi në Këshillin e Evropës, duhet ta bëjmë asociacionin”, ka deklaruar Kupchan.

Sipas tij, faktori ndërkombëtar do veprojë ngjashëm edhe ndaj Serbisë, duke rritur presionin për ta pranuar marrëveshjen e Ohrit.

“Taktikë e njëjtë do të përdoret edhe ndaj Serbisë duke marrë parasysh që kemi një marrëveshje të gatshme, Marrëveshjen e Ohrit, e cila deri tani nuk ka arritur që të shtyjë Serbinë dhe Kosovën të lëvizin drejt implementimit. Tani po shohim Unionin Europian dhe KiE që kanë nisur të shfrytezojnë leva politike me shpresën se do ta shtyjnë përpara këtë proces normalizimi” – deklaroi profesori amerikan të Marrëdhënieve Ndërkombëtare, I cili duke folur per ngjarjen në Banjskë tha se Milan Radojicic ende po vazhdon të mbetet i lire dhe vlerësoi se sjellja e tij para drejtësisë do të marrë kohë.

Ministri i Punëve të Brendshme të Serbisë, Ivica Daçiç tha se rezoluta për Srebrenicën në Asamblenë e Përgjithshme të Kombeve të Bashkuara nën maskën e luftës kundër gjenocidit po politizohet si temë.

Ai për TV Prva theksoi se nëse çështja e Kosovës do të ishte në agjendën e këtij organi, Perëndimi me siguri do të përjetonte fiasko dhe se sipas tij, është e vështirë të thuhet nëse numërimi i votave pro dhe kundër rezolutës për Srebrenicën duhet të trajtohet nga këndvështrimi i marrëdhënieve dypalëshe apo nën hijen e presionit të ushtruar mbi ato vende.

“Ka vende jashtëzakonisht mike me Serbinë që janë në një situatë shumë të vështirë presioni nga vendet perëndimore. Jo vetëm nga ato që propozuan zyrtarisht rezolutën, por edhe nga ato vende që i qasen çështjes duke mos toleruar që dikush të përpiqet ta përmbysë atë rezolutë. Po të ishte çështja e Kosovës në rendin e ditës të Asamblesë së Përgjithshme, mund të themi me bindje të plotë se do të përjetonin një fiasko, prandaj nuk është në rend dite, sepse ata e dinë se nuk mund ta kalojnë Asamblenë e Përgjithshme të OKB-së” – theksoi  Ivica Daçiç