Dyshohet se dy të rinj u dhunuan nga policia maqedonase, BDI kërkon dorëheqje në Ministrinë e Brendshme

Pretendimet e dy të rinjve shqiptarë, 21 dhe 23 vjeç, se janë keqtrajtuar fizikisht nga pjesëtarë të policisë në Shkup, kanë nxitur reagime politike dhe publike në Maqedoninë e Veriut. BDI kërkon dorëheqjen e zëvendësministrit të Punëve të Brendshme, Astrit Iseni, ndërsa Lidhja Shqiptare kërkon largimin e tij dhe të ministrit Pançe Toshkovski, si dhe përfshirjen e organizatave ndërkombëtare në zbardhjen e rastit.

Ngjarja u bë publike pas publikimit të fotografive ku dy të rinjtë shfaqen me lëndime të dukshme në fytyrë. Sipas pretendimeve të tyre, dhuna ka vijuar edhe pasi u janë lidhur duart dhe janë shtrirë përtokë. Ata kanë deklaruar gjithashtu se gjatë ndërhyrjes policore janë përdorur armë zjarri dhe se u janë shpuar gomat e automjetit.

Bashkimi Demokratik për Integrim kërkon hetim të menjëhershëm, të paanshëm dhe transparent, duke vënë në dukje kundërthëniet mes raportit të brendshëm policor dhe deklarimeve të të rinjve. Sipas BDI-së, në raportin policor pretendohet se të rinjtë i kanë marrë pistoletën një zyrtari policor, ndërsa ata deklarojnë se arma ka përfunduar në automjetin e tyre pasi policia u ka thyer xhamin.

“​​Kërkojmë hetim të menjëhershëm, të paanshëm dhe transparent për zbardhjen e plotë të ngjarjes, si dhe përgjegjësi për çdo shkelje nga ana e zyrtarëve policorë. Heshtja dhe mungesa e përgjegjësisë nuk janë opsion!”, thuhet në komunikatën e BDI-së.

Partia kërkon që përgjegjësia të mos kufizohet vetëm te punonjësit e policisë që dyshohet se janë përfshirë në incident, por të shtrihet edhe në nivelet drejtuese të institucionit. Për këtë arsye, BDI kërkon dorëheqjen e zëvendësministrit Astrit Iseni.

Reagim ka ardhur edhe nga Lidhja Shqiptare, e cila dënon dhunën e pretenduar dhe kërkon që rasti të hetohet jo vetëm në rrugë disiplinore, por edhe penale. Sipas kësaj partie, informacionet që disponon ngrenë dyshime se raste të ngjashme mund të mos jenë të izoluara.

Në komunikatën e saj, Lidhja Shqiptare e cilëson sjelljen e pretenduar si represion ndaj shqiptarëve dhe e krahason me periudhën e qeverisjes së ish-kryeministrit Nikolla Gruevski.

“Sjellja e këtillë e kriminelëve të veshur me petkun e policisë nuk është asgjë tjetër, vetëm se represion i aparatit shtetëror ndaj shqiptarëve, ngjashëm si në kohën e Gruevskit”, thuhet në deklaratën e partisë.

Lidhja Shqiptare kërkon përgjegjësi ligjore për çdo shkelje që mund të provohet, si dhe përgjegjësi komanduese e politike. Përveç dorëheqjes së Astrit Isenit, ajo kërkon edhe largimin e ministrit të Punëve të Brendshme, Pançe Toshkovski.

Partia njofton se u ka dërguar një letër zyrtare përfaqësive diplomatike të vendeve europiane, Shteteve të Bashkuara të Amerikës dhe Bashkimit Europian, duke kërkuar vëmendjen e tyre për rastin. Ajo kërkon gjithashtu përfshirjen e misionit të OSBE-së, Komitetit të Helsinkit dhe organizatave të tjera ndërkombëtare për të monitoruar pretendimet për dhunë policore dhe shkelje të të drejtave themelore.

Në debatin publik ka ndërhyrë edhe Mevlan Ademi, i cili përmes një postimi në Facebook ka vënë në pikëpyetje reagimin dhe përgjegjësinë e institucioneve pas publikimit të fotografive të të rinjve.

“Shteti im? Shteti jot? Shteti jonë?? Rrini të qetë se e zgjidhin këta TONËT”, shkroi Ademi.

Rasti ka rikthyer në vëmendje çështjen e llogaridhënies së policisë dhe përgjegjësisë institucionale për pretendimet për keqtrajtim. Deri në përfundimin e hetimeve, akuzat e ngritura nga të rinjtë mbeten pretendime që kërkojnë verifikim të pavarur. Në qendër të kërkesave politike dhe publike është zhvillimi i një hetimi transparent, sqarimi i kundërthënieve mes versioneve dhe marrja e masave nëse konstatohen shkelje.