E ndoqën nga Viroi dhe e hodhën në erë në bulevard/ 300 gramë tritol në makinën e “Çilo Hunderrit”

Hetimet për atentatin me tritol në Gjirokastër, ku humbi jetën 45-vjeçari Beqir Devolli, i njohur me nofkën “Çilo Hunderri”, po vijojnë intensivisht. Nga shpërthimi mbeti i plagosur edhe 26-vjeçari Erigels Mela, i cili ndodhej në automjet me viktimën.

Sipas burimeve mediatike, sasia e lëndës shpërthyese të vendosur në automjet përllogaritet rreth 300 gramë. Dyshohet se autorët e kanë ndjekur makinën e Devollit për afro 3 kilometra, nga zona e Viroit deri në bulevardin “18 Shtatori”, ku ndodhi shpërthimi fatal.

Burimet bëjnë me dije se shpërthimi dyshohet të jetë aktivizuar me telekomandë, pasi autorët kanë pritur që rruga të boshatisej përpara se të vinin në zbatim planin e tyre.

Lëvizjet e fundit të viktimës para shpërthimit

Pak para orës 22:00 të mbrëmjes së ngjarjes, Beqir Devolli kishte pirë kafe me një mik dhe më pas ishte nisur me automjet drejt banesës. Gjatë rrugës, rreth 700 metra larg vendit ku ndodhi shpërthimi, në makinë ishte bashkuar edhe Erigels Mela.

Sipas raportimeve, të dy personat kishin marrë më parë kërcënime nga persona ende të paidentifikuar. Megjithatë, nuk është konfirmuar nëse këta persona kanë lidhje me atentatin.

Një vit më parë, automjeti tip “Range Rover” i Melës ishte përfshirë nga zjarri, ngjarje që po shqyrtohet edhe në kuadër të hetimeve aktuale. Ndërkohë, Beqir Devolli kishte qenë nën masën e “arrestit në shtëpi” në Tiranë për dy vjet.

Kamerat e sigurisë në fokus të hetimeve

Në kuadër të hetimeve, janë sekuestruar pamjet e kamerave të sigurisë të një banke të nivelit të dytë, të cilat raportohet se kanë regjistruar momentet e atentatit.

Pamjet pritet të ndihmojnë grupin hetimor në rindërtimin e dinamikës së ngjarjes, ndjekjen e lëvizjeve të automjetit dhe identifikimin e personave të dyshuar.

Sipas dyshimeve paraprake, në atentat mund të kenë marrë pjesë dy persona, të cilët kanë ndjekur viktimën deri në momentin e shpërthimit. Megjithatë, autorët dhe mënyra e saktë e organizimit të sulmit ende nuk janë konfirmuar zyrtarisht.

Dy pista kryesore: hakmarrja dhe aktiviteti jashtë vendit

Hetuesit po shqyrtojnë disa pista për të zbardhur motivet e atentatit. Njëra lidhet me aktivitetin e dyshuar të Devollit jashtë Shqipërisë, ku sipas raportimeve mediatike po verifikohet mundësia e përfshirjes së tij në trafikimin e lëndëve narkotike në Greqi.

Pista tjetër lidhet me hakmarrjen dhe me një lidhje të mundshme me vrasjen e Artan Myrtajt në Sarandë, rreth dy javë më parë. Deri tani, nuk ka konfirmim zyrtar që t’i lidhë drejtpërdrejt këto dy ngjarje.

Sipas informacioneve të publikuara, Devolli ishte kthyer nga Tirana pak para shpërthimit, ndërsa familja e tij banon në një fshat të Gjirokastrës.

Hetimet vijojnë për të zbardhur motivet, identitetin e autorëve dhe personat që mund të kenë organizuar atentatin.