EUROPA PO DIGJET EDHE NË DET/ Temperaturat deri në 6°C mbi normalen, shkencëtarët japin alarmin

Një analizë e re ka evidentuar një “zgjerim masiv” të valëve të të nxehtit detargjatë vitit 2026. Fenomeni ka prekur rreth 90% të rajonit të Gjirit të Biskajës dhe bregdetit të Gadishullit Iberik, ndërsa rreth 80% e Mesdheut perëndimor është përfshirë nga temperaturat e pazakonta.

Sipas studiuesve, situata është një tjetër tregues i ndikimit gjithnjë e më të madh të ndryshimeve klimatike mbi oqeanet dhe detet europiane.

Dy javët më të nxehta të regjistruara këtë vit në tre nga katër rajonet detare të analizuara do të ishin praktikisht të pamundura në kushtet klimatike të periudhës paraindustriale, sipas një analize të World Weather Attribution.

Situata është veçanërisht e pazakontë në rajonin kelt, që përfshin pjesën më të madhe të ujërave përreth Ishujve Britanikë. Temperaturat e regjistruara atje kanë arritur nivele që në të kaluarën shfaqeshin vetëm rreth një herë në shekull.

Studiuesit vlerësojnë se ndryshimet klimatike janë përgjegjëse për rreth dy të tretat e nxehtësisë së tepërt të evidentuar në studim.

Në Mesdhe, ujërat janë ngrohur me rreth 2°C, ndërsa në Gjirin e Biskajës dhe përgjatë Gadishullit Iberik rritja ka qenë rreth 1.4°C. Në zonat përreth Irlandës dhe Kanalit Anglez, temperaturat janë rritur me rreth 1.3°C.

Megjithëse vala e të nxehtit detar mund të jetë drejt fundit në disa prej këtyre rajoneve, ekspertët paralajmërojnë se problemi më i madh nuk është zhdukur. Rritja e temperaturave të deteve mund të ketë pasoja të rëndësishme për ekosistemet detare, jetën e gjallesave dhe klimën e Europës në tërësi.

Të dhënat e fundit rikthejnë në qendër të vëmendjes paralajmërimet e shkencëtarëve se temperaturat ekstreme nuk po kufizohen më vetëm në tokë, por po prekin gjithnjë e më shumë edhe detet dhe oqeanet.