Ne harrojmë shpejt. Kujtesa jonë është si e peshqve. Një javë duke analizuar, debatuar, kritikuar, sulmuar, mallkuar, listën, apo mungesat në ekipin provizor thirrur nga Silvinjo. (1 milionë e ca trajnerë që mund të bënin më mirë se ky).

Ka dy gjëra shumë më madhore se disa të qejmbetur. Shqipëria është në Europian, në finalet e tij. Nuk jemi duke diskutuar se “për pak ia dolëm”, apo “vendi i tretë nga fundi është më i mirë se vendi i dytë nga fundi”, por po diskutojmë të kalojmë Italinë, Spanjën apo Kroacinë!!! Dhe kjo teorikisht duhet t’i bënte bashkë gjithë shqiptarët e shqipfolësit.

Kujt i thua! Do gjejnë një kleçkë me domosdo dhe me se s’bën do japin mendimin e tyre që kategorikisht është më i miri, më i sakti, dhe padiskutim më i arrirë se i Silvinjos. (Humels nuk u thirr në kombëtaren gjermane, por u mërzit vetëm mbrojtësi veteran, jo gjysma e Gjermanisë).

E bukura është kur komentuesit e rrjeteve sociale bëjnë ekspertin, ndërsa “ekspertët” nëpër studio e intervista bëjnë të irrituarin e rrjeteve sociale.

Uroj me shpirt që Shqipëria të bëjë një paraqitje më shumë se fantastike në Gjermani, jo vetëm për kënaqësinë e të gjithë shqiptarëve, për emrin, për të ardhmen, krenarinë, por andej nga fundi i listës, edhe për të mos patur mundësi që shpirtvegjlit të gëzohen e të nisin të shesin pordhë me tonë për “parashikimet” e tyre e gabimet e Silvinjos, e jo me kile si deri tani.

Forca Shqipëri! Forca djema! Forca Silvinjo!

Rap-artisti i njohur shqiptar, Capital T, ka prezantuar projektin e tij të ri, e cila është kënga zyrtare që do të shoqërojë kombëtaren në Euro2024.

Ky projekt është shkruar nga vet këngëtari në bashkëpunim me Tonic dhe Denk, ndërsa për ‘beat’-in është përkujdesur Dorantbeats, Bannzz nga Panda Music.
Kënga është publikuar menjëherë edhe nga faqja zyrtare e Federatës Shqiptare të Futbollit. Pjesë të klipit janë edhe djemtë e kombëtares me momentet e gëzimit nga kualifikimi në Europian.

Trim Ademi (emri i vërtetë) ka bërë një interpretim të shkëlqyer dhe njw klip të veçantë, duke përfshirë pak nga të gjitha karakteristikat e bukura të Shqipërisë.
Kjo këngë do t’i shoqërojë kuqezinjtë në aventurën e tyre në kampionatin Europian ‘Gjermani 2024’.

“Momenti ynë”. Është kjo kopertina e një interviste që sulmuesi i kombëtares, Armando Broja, ka dhënë për platformën digjitale angleze “Rising Ballers”, një ndër mediat me rritjen më të madhe në Angli për brezin e ri.

Siç shpjegon dhe titulli, “Koha jonë” apo më shqip, “Momenti ynë” , Broja flet për aventurën në Euro 2024 me Shqipërinë, duke prekur tema të rëndësishme, duke nisur që nga tifozët, arma më shumë e kuqezinjve, për të cilët Broja shprehet.

“Tifozët shqiptarë janë më të mirët në botë, të gjithë bashkë jemi një, tifozë, lojtarë dhe vendi”.

Shqipëria është në grupin e ferrit të Europianit, me përfaqësuese gjigante si Italia, Spanja e Kroacia, me 22-vjeçarin që komenton.

Më tej Broja shpjegon për median angleze edhe festimin e veçantë me shqiponjë, aq popullor për shqiptarët, por që ngjall kërshëri në ambientin britanik.

“Kur shënoj, bëj festimin me shqiponjën shqiptare. Shumë njerëz mendojnë se po imitoj festimin e Anelka-s, por unë e dua vendim tim kaq shumë, ndaj e bëj. Është një festim unik dhe vërtet shumë i bukur”.

Për sa i përket Europianit dhe ndjesisë personale që do të jetë aty, Broja shprehet,

“Është një ëndërr e madhe që bëhet realitet, të luaj në Europian për vendin tim. Për mua, familjen dhe këdo që më ka mbështetur në udhëtimin tim”.

ATHINË – Olympiacos fitoi 1-0 kundër Fiorentinës në finalen e Conference League, duke siguruar trofeun e parë evropian për një skuadër greke. Djemtë e Mendillibar u kujdesën mos pësonin dhe i shkaktuan humbje italianëve në minutën e 115-të. Për të dytin vit radhazi Fiore humbet në finalen e këtij kompeticioni duke mos ia dalë të sigurojë trofeun.

Ndeshja nisi në ekuilibër, me Violat që ishin një marsh më shumë, por pa mundur të shënonin edhe për shkak të një pozicioni jashtë loje. Ndeshja vijoi me raste, teksa në 90 minuta nuk u shënua gol.

Përballja finale më stadiumin “Shën Sofia” të Athinës shkoi në 30 minutat shtesë, duke u dashur El Kaabi në të 115 minutë për të shënuar. Sulmuesi i Olympiacos nxori një gol nga hiçi, për të shkruar historinë e klubit të tij.

Suksesi shkon edhe për trajnerin Mendillibar, që vjet fitoi Europa League me Sevillan dhe këtë sezon ngre trofeun e Conference League edhe pse jo më shumë se katër muaj në ekip.

Nga ana tjetër te Fiorentina e Italianos ka zhgënjim, pasi klubi nga Firenze dështon për herë të dytë radhazi ne finalen e Conference League.

Kjo ishte finalja e tretë e Conference League, turneut të ri të UEFA-s. Më herët ketë trofe e kanë siguruar Roma në finalen e Tiranës dhe Uest Ham në Pragë.

Formacionet zyrtare:

OLYMPIACOS (4-2-3-1): Tzolakis; Rodinei, Retsos, David Carma, Ortega; Hezze, Iborra; Podence, Chiquinho, Fortounis; El Kaabi Trajner: Mendilibar.

FIORENTINA (4-3-3): Terracciano; Dodo, Milenkovic, Martinez Quarta, Biraghi; Bonaventura, Arthur, Mandragora; Gonzalez, Belotti, Kouame Trajner: Italiano.