Goditet “Rrjeti Krasniqi” në Kosovë/ 7 anëtarë të dyshuar në pranga

Shtatë persona të lidhur me të ashtuquajturin “Rrjeti Krasniqi” janë arrestuar, sipas një raportimi të publikuar më 13 gusht 2026 nga britanikja “The Telegraph”. Grupi dyshohet se prodhonte dokumente të falsifikuara, të cilat u siguroheshin rrjeteve kriminale të përfshira në kalimin e paligjshëm të emigrantëve drejt vendeve të Europës.

Operacioni e kishte zanafillën më 24 janar 2025, kur Policia e Kosovës ndaloi në Prishtinë një automjet të drejtuar nga F.K. Brenda tij u gjetën 16 çanta me pasaporta, patenta, dokumente të paplotësuara dhe materiale holografike.

Hetimet çuan më pas në zbulimin e një laboratori të sofistikuar në lagjen “Qëndresa” në Prishtinë. Sipas autoriteteve kosovare, aty u sekuestruan makina laserike, printerë profesionalë, mbi 20 mijë mikroçipa dhe mijëra dokumente që u përkisnin 51 shteteve.

Mbretëria e Bashkuar e kishte futur rrjetin në listën e sanksioneve më 22 tetor 2025, duke vendosur ngrirje pasurish dhe ndalim udhëtimi. Në listë u përfshinë nëntë persona, të cilët autoritetet britanike i lidhën me drejtimin, prodhimin, ndërmjetësimin, reklamimin ose sigurimin e ambienteve dhe pajisjeve për laboratorin.

Raportimi i fundit britanik flet për shtatë të arrestuar, mes të cilëve përmenden Flamur Krasniqi, Valon Krasniqi, Arif Krasniqi, Sami Duriqi, Granit Avdyli dhe Nexhmije Selmani. Për shkak se lista e plotë e shtatë të arrestuarve nuk është publikuar ende në një komunikatë të re zyrtare të autoriteteve kosovare, NTV nuk po shton emra të tjerë pa konfirmim.

Personat konsiderohen të pafajshëm derisa përgjegjësia e tyre të përcaktohet me vendim të formës së prerë.