Goditi rafineritë ruse/ Trump ndëshkon Zelenskyn: Është koha që Ukraina të ketë një president të ri

Presidenti amerikan Donald Trump ka ashpërsuar kritikat ndaj homologut ukrainas, Volodymyr Zelensky, duke thënë se Ukraina duhet të ketë një udhëheqës të ri, i cili të jetë në gjendje të arrijë një marrëveshje për përfundimin e luftës me Rusinë.

Në deklaratat e tij, Trump kritikoi edhe sulmet ukrainase ndaj rafinerive ruse të naftës. Sipas tij, këto goditje mund të ndikojnë në furnizimin me karburant dhe të rrisin çmimet në tregje.

Duke folur për mediat, presidenti amerikan tha se Zelensky kishte pasur disa mundësi për të arritur marrëveshje, por nuk i kishte shfrytëzuar.

“Unë sugjeroj që të gjejnë një udhëheqës të ri, i cili mund të bëjë një marrëveshje. Ai pati shumë mundësi për të bërë marrëveshje, por nuk bëri asnjë”, deklaroi Trump.

Një tjetër pikë e kritikave të tij lidhet me sulmet ndaj infrastrukturës ruse të përpunimit të naftës. Trump tha se Uashingtoni i kishte kërkuar Kievit të mos godiste rafineritë, me argumentin se sulme të tilla mund të krijojnë probleme për furnizimin dhe çmimet në mbarë botën.

“Ne u thamë: ‘Mund të bëni çfarë të doni në Rusi, por mos i godisni rafineritë, sepse kjo krijon problem për të gjithë botën’”, u shpreh ai.

Trump tha se pasojat e sulmeve mund të ndihen edhe nga konsumatorët amerikanë, përfshirë fermerët dhe blegtorët, përmes ndikimit të mundshëm te furnizimi me naftë dhe çmimet e karburanteve.

Deklaratat e tij pasuan një raportim të Axios, sipas të cilit administrata amerikane i kishte kërkuar Ukrainës të ndalonte sulmet ndaj rafinerive ruse. Sipas raportimit, Uashingtoni ishte i shqetësuar për ndikimin e mundshëm të këtyre sulmeve në çmimet e karburanteve për konsumatorët amerikanë.

Kievi kishte propozuar një marrëveshje të ndërsjellë për ndalimin e sulmeve ndaj infrastrukturës energjetike. Sipas raportimit, Zelensky ia kishte paraqitur këtë ide Trumpit dhe të dërguarve amerikanë Steve Witkoff dhe Jared Kushner. Propozimi parashikonte që Ukraina të ndalonte sulmet ndaj rafinerive ruse, nëse Rusia do të ndërpriste goditjet ndaj termocentraleve dhe infrastrukturës energjetike ukrainase.

Një zyrtar amerikan i cituar në raportim tha se Trump nuk e pranoi propozimin, pasi nuk i konsideronte sulmet ukrainase ndaj rafinerive ruse dhe sulmet ruse ndaj termocentraleve ukrainase si veprime të barasvlershme. Sipas të njëjtit zyrtar, kërkesa e Uashingtonit ndaj Kievit ishte që Ukraina të ndalonte sulmet ndaj impianteve ruse të naftës, pa e kushtëzuar këtë me një angazhim të ngjashëm nga Moska.

Deklaratat e fundit shënojnë një tjetër përplasje mes administratës amerikane dhe udhëheqjes ukrainase, në një kohë kur përpjekjet diplomatike për përfundimin e luftës vijojnë dhe kushtet e një marrëveshjeje me Rusinë mbeten objekt mosmarrëveshjesh.