I kërkuari nga SPAK del në videot e telefonatave para policëve/ Inez Hajrulla u kërkon: Largohuni nga lokali

Një episod i pazakontë është raportuar në Vlorë, ku një kontroll i Policisë për muzikë të lartë dyshohet se ka përfunduar me një videotelefonatë mes efektivëve dhe Inez Hajrullës, person i shpallur në kërkim në kuadër të një hetimi të SPAK.

Sipas raportimeve mediatike, ngjarja ka ndodhur rreth orës 23:20 të 1 gushtit, në zonën e “Ujit të Ftohtë”. Efektivët kishin shkuar për të verifikuar ankesa për muzikë me volum të lartë në disa subjekte të zonës.

Gjatë kontrollit në një prej lokaleve, një person që u është prezantuar policëve si menaxher i subjektit u ka zgjatur telefonin, ku po zhvillohej një videotelefonatë në WhatsApp me Inez Hajrullën.

Sipas të njëjtave burime, Hajrulla u ka kërkuar efektivëve të largoheshin dhe të mos vijonin kontrollin në lokal.

Por situata ka marrë tjetër drejtim. Në momentin kur personi ka futur telefonin në çantën që mbante me vete, policët kanë konstatuar një armë zjarri.

Gjatë kontrollit të mëtejshëm raportohet se janë sekuestruar arma, sasi të dyshuara lëndësh narkotike, para në valuta të ndryshme, një telefon celular dhe çelësi i një automjeti. Personi, i identifikuar me inicialet E.O., është shoqëruar në Komisariatin e Policisë së Vlorës.

Kontrollet kanë vijuar edhe në automjetin e tij, ku raportohet se është gjetur një tjetër sasi materiali bimor të dyshuar si lëndë narkotike.

Inez Hajrulla rezulton në kërkim pas një operacioni të zhvilluar më 7 mars 2026 me urdhër të SPAK në Vlorë.

Rasti ngre një pyetje serioze: si është e mundur që një person në kërkim nga drejtësia të komunikojë drejtpërdrejt me efektivët gjatë një kontrolli policor dhe, sipas raportimeve, t’u kërkojë atyre të largohen?

Për episodin e videotelefonatës pritet një sqarim zyrtar nga Policia e Shtetit.