Ilir Kulla shpërthen ndaj ministres serbe: Milosevići theu qafën në Kosovë

Analisti Ilir Kulla ka reaguar me tone tepër të ashpra ndaj ministres serbe Snežana Paunović, pas një interviste të saj lidhur me Kosovën.

Paunović, e lindur në Pejë dhe aktualisht ministre e Administratës Publike dhe Vetëqeverisjes Lokale në Serbi, është pjesë e Partisë Socialiste të Serbisë.

Në një postim në faqen e tij në Facebook, Kulla e lidh intervistën e ministres serbe me kujtimet e luftës në Kosovë dhe me një histori që, sipas tij, qarkullonte mes luftëtarëve të UÇK-së në Rrafshin e Dukagjinit.

“Kur pashë intervistën e kësaj ministres Snežana Paunović, m’u kujtua një batutë gjatë luftës e shokut tim Isuf Ibërdemaj”, shkruan Kulla.

Ai përmend më pas një kërcënim të rëndë që, sipas rrëfimit të tij, krimineli serb Željko Ražnatović-Arkan kishte bërë ndaj këngëtares kosovare Adelina Ismaili.

Sipas Kullës, djemtë e UÇK-së në Rrafshin e Dukagjinit, nën komandën e Ramush Haradinajt, i ishin përgjigjur Arkanit përmes vargjeve:

“O Arkan, o i biri i shkines,
çka po don me i ba Adelines?
Në ta marrtë mendja se je dikushi,
hajde lype te Ramushi.”

Në përfundim të reagimit, Kulla i drejtohet drejtpërdrejt ministres serbe, duke deklaruar se fushata e spastrimit etnik e nisur nga regjimi i Slobodan Miloševićit u thye nga rezistenca e popullit të Kosovës dhe e Ushtrisë Çlirimtare të Kosovës.

“Miloševići e nisi spastrimin etnik, por theu qafën dhe kokën, bashkë me banditët e tij, pikërisht nga gjaku i popullit të Kosovës dhe UÇK-së”, shkruan Ilir Kulla.

Postimi përmban gjuhë të rëndë dhe pretendime historike të paraqitura si kujtime personale të autorit. Rrëfimi për kërcënimin dhe vargjet e cituara nuk është verifikuar në mënyrë të pavarur.

#IlirKulla #SnežanaPaunović #Kosova #UÇK #RamushHaradinaj