Imperializmi i zi/ Lufta SHBA-Iran: Beteja për Mbijetesën e Petrodollarit

Sot, lufta mes SHBA-së dhe Iranit zhvillohet kryesisht për mbijetesën e sistemit të Petrodollarit. Ky sistem e ka zanafillën në “Tronditjen e Niksonit” të vitit 1971, kur dollari u shkëput nga ari (sistemi i Bretton Woods i krijuar nga Ruzvelti) dhe u lidh me naftën. Kalimi nga këmbimi fiks në atë fluktuativ i dha një fuqi të pakufizuar kartelit bankar privat, duke vendosur gjenezën e modelit imperial të Pax Americana, si trashëgimtare e Pax Britannica.

Në këtë sistem, karteli financiar e prodhon dollarin si borxh. Meqenëse dollari është monedhë private, vetë qeveria amerikane e merr atë si hua. Lidhja e dollarit me naftën detyron shtetet prodhuese t’i nënshtrohen diktatit të Uashingtonit: shitja e naftës duhet të bëhet vetëm me dollarë. Kjo krijon një kërkesë artificiale globale, duke e bërë jetik kontrollin e nyjeve energjetike dhe rrugëve detare nga ana e SHBA-së.

Në këtë mozaik, FMN-ja dhe Banka Botërore luajnë rolin e “shpëtimtarit” për shtetet që përballen me mungesë likuiditeti. Mirëpo, kreditë e tyre kushtëzohen me “reforma strukturore” dhe liberalizim ekstrem. Këto kushte synojnë privatizimin dhe shitjen e aseteve strategjike kombëtare te korporatat transacionale.

Manipulimi i Bursave dhe “Thithja e Gjakut” Ekonomik

Meqenëse dollari është monedhë rezervë, çmimet nuk caktohen nga ligji i kërkesës dhe ofertës, por nga manipulimi i bursave. Bankierët prodhojnë instrumente komplekse financiare (derivate) për të imponuar injektim sa më të madh të dollarit në sistem. Kur Rezerva Federale (FED) lëviz normat e interesit, ajo rivlerëson dollarin dhe zhvlerëson valuta nacionale. Përmes këtyre sulmeve spekulative, “thithet gjaku” i ekonomive nacionale, të cilat futen në një cikël borxhesh të papagueshme

Ky imperializëm financiar diktohet nga një pakicë që operon përmes korporatave si BlackRock dhe Vanguard, të cilat kontrollojnë një kapital prej rreth 25 trilionë dollarësh — sa GDP-ja e SHBA-së dhe Kinës së bashku. Sot, nevoja për digjitalizim monetar dhe një “RESET” global vjen sepse matematika financiare ka prodhuar numra pa asnjë mbulim në ekonominë reale. Fokusi i ri është kontrolli digjital i konsumit të qytetarit për të reduktuar kërkesën për burime reale.

Ky model po sfidohet hapur nga blloku BRICS. Kina, përmes industrializimit, dhe Rusia nuk pranuan më nënshtrimin. Në këtë front, Irani shërben si mburojë; ai u sanksionua pikërisht sepse refuzoi t’ia dorëzonte pasurinë e tij energjetike diktatit të dollarit.

Përfundimi: Hiperinflacioni dhe Implodimi

Mbijetesa e Petrodollarit përcakton fatin e imperializmit financiar. Nëse SHBA-ja humbet këtë luftë gjeopolitike, procesi i de-dollarizimit do ta lërë monedhën amerikane pa mbeshtetje fizike. Rënia e kërkesës globale do të bënte që sasia e pafundme e dollarëve të mbytë tregun amerikan, duke shkaktuar hiperinflacion dhe implodim të sistemit nga brenda. Kjo do të shënonte fundin e epokës së pasurisë spekulative dhe kalimin drejt një rendi të ri të bazuar në komoditete reale dhe ar, ashtu siç po veprojnë aktualisht shtetet e BRICS.