Ishte ai që futi Amerikën në luftë me ne/ Irani shpërthen dhe akuzon Netanyahun

Teherani hedh akuza të forta ndaj kryeministrit izraelit Benjamin Netanyahu, duke e akuzuar se ka ndikuar mbi Uashingtonin për ta përfshirë drejtpërdrejt në konfliktin me Iranin.

Ministri i Jashtëm iranian, Abbas Araghchi, e ka cilësuar Netanyahun një “gjarpër”, duke pretenduar se ai ka manipuluar administratën amerikane për t’i shërbyer interesave të Izraelit.

Në një postim në platformën X, Araghchi iu referua deklaratave të Netanyahut në hebraisht, duke pretenduar se kryeministri izraelit është shprehur se ka arritur të ndikojë mbi politikën amerikane dhe ta shtyjë Uashingtonin drejt përplasjes me Teheranin.

Sipas kryediplomatit iranian, Netanyahu ka përdorur edhe daljet e shpeshta në mediat amerikane për të ushtruar ndikim mbi opinionin dhe politikën në SHBA.

Araghchi pretendon gjithashtu se Netanyahu përdor mesazhe të ndryshme në varësi të audiencës: në hebraisht flet për ndikimin e tij mbi Uashingtonin, ndërsa në anglisht vlerëson lidershipin e presidentit Donald Trump.

Deklaratat vijnë në një moment tensioni të lartë mes Iranit, Izraelit dhe Shteteve të Bashkuara, ndërsa përpjekjet diplomatike për ndalimin e konfliktit mbeten të bllokuara.

Ndërkohë, administrata Trump po shton presionin ekonomik ndaj Teheranit përmes sanksioneve, duke kërkuar lëshime lidhur me programin bërthamor dhe kapacitetet raketore të Iranit.

Përplasja është përshkallëzuar pas sulmeve të përbashkëta izraelite dhe amerikane ndaj Iranit më 28 shkurt, ndërsa luftimet kanë shkaktuar mijëra viktima dhe pasoja të ndjeshme ekonomike.

Teherani akuzon Izraelin se kërkon ta mbajë Uashingtonin të përfshirë në konflikt. SHBA-ja dhe Izraeli, nga ana tjetër, e konsiderojnë programin bërthamor dhe kapacitetet ushtarake iraniane kërcënim për sigurinë rajonale.

Përplasja tashmë zhvillohet në tre fronte: ushtarak, ekonomik dhe diplomatik.

Dhe ndërsa armët vazhdojnë të flasin, lufta e deklaratave mes Teheranit, Tel Avivit dhe Uashingtonit duket larg përfundimit.