Kamioni përplaset me autobusin turistik, 11 të vdekur dhe 27 të plagosur

E diela e 11 tetorit është përgjakur nga një aksident i rëndë rrugor në perëndim të Turqisë, ku përplasja mes një kamioni me rimorkio dhe një autobusi turistik ka shkaktuar të paktën 11 viktima dhe 27 të plagosur.

Aksidenti tragjik u regjistrua në zonën e Akhisarit, në qarkun e Manisës. Sipas raportimeve nga autoritetet vendore, përplasja e fortë shkaktoi pasoja të rënda për udhëtarët, disa prej të cilëve mbetën të bllokuar brenda autobusit të dëmtuar.

Menjëherë pas marrjes së njoftimit, në vendngjarje mbërritën dhjetëra autoambulanca, forca policore dhe ekipe zjarrfikëse, të cilat punuan për nxjerrjen e personave të bllokuar dhe dhënien e ndihmës së parë.

Të plagosurit u transportuan me urgjencë në spitalet e zonës, ndërsa disa prej tyre raportohet se ndodhen në gjendje kritike për jetën.

Ndërkohë, autoritetet turke kanë nisur hetimet për të zbardhur shkaqet e aksidentit dhe rrethanat në të cilat ndodhi përplasja fatale.

Bilanci i rëndë e ka kthyer këtë të diel në një ditë zie për familjet e viktimave, ndërsa pritet që hetimet të hedhin dritë mbi përgjegjësitë për aksidentin.