Kosova në mes të pazarit gjeopolitik, çfarë fshihet në prapaskenë pas afrimit Zelensky-Vuçiç

Vizita e presidentit ukrainas Volodymyr Zelensky në Beograd dhe takimi i tij me Aleksandar Vuçiqin kanë hapur një kapitull të ri në marrëdhëniet Ukrainë–Serbi, por njëkohësisht kanë rikthyer Kosovën në qendër të debatit.

Pas takimit, Zelensky përsëriti se Ukraina nuk e njeh pavarësinë e Kosovës, duke shkaktuar reagime të forta në Prishtinë. Madje, në kryeqytetin e Kosovës u hoq edhe pankarta “Free Ukraine”, e vendosur pas nisjes së pushtimit rus.

Por pas përplasjes diplomatike fshihet një interes shumë më pragmatik: Ukraina ka nevojë për municione, ndërsa Serbia ka kapacitete të rëndësishme prodhuese, veçanërisht për municione të standardeve sovjetike që ende përdoren nga ushtria ukrainase.

Kjo mund ta bëjë Vuçiqin një partner të rëndësishëm për Kievin, pavarësisht marrëdhënieve tradicionale të Beogradit me Moskën.

Nga ana tjetër, Vuçiqi mund ta shfrytëzojë afrimin me Zelenskyn për të përmirësuar pozicionin e Serbisë ndaj Bashkimit Evropian dhe për të krijuar imazhin e një Beogradi që mund të bashkëpunojë me Perëndimin.

Por ndërsa Kievi kërkon mbështetje ushtarake dhe Beogradi kërkon hapësirë diplomatike, Kosova mbetet pika më e ndjeshme e kësaj marrëdhënieje.

Qëndrimi i Zelenskyt për Kosovën ka shkaktuar zhgënjim në Prishtinë, sidomos për shkak të mbështetjes që Kosova i ka dhënë Ukrainës që nga fillimi i luftës.

Ndërkohë, deklaratat e Vuçiqit për Ibrin dhe përplasjet e tij me Prishtinën e Tiranën kanë shtuar edhe më tej tensionin.

Në dukje, Zelensky dhe Vuçiq po afrohen. Në prapaskenë, secili duket se kërkon diçka tjetër: Ukraina armë dhe mbështetje, Serbia ndikim dhe hapësirë ndaj BE-së. Ndërsa Kosova përballet me një realitet të ri diplomatik.