Kurti nuk sillet si fitues, gazetarët i shpall “të Serbisë”

Kandidati për kryeministër nga radhët e Lëvizjes Vetëvendosje, Albin Kurti, teksa ka shpallur fitoren në zgjedhjet e 9 shkurtit në sheshin “Skënderbeu”, para simpatizantëve të tij ka sulmuar edhe gazetarët duke thënë se kjo datë tregoi se populli e ka mundur edhe “Serbinë edhe Klan Serbinë”.

Përveç gazetarëve në fjalimin e tij ka sulmuar edhe opozitën.

“Ajo që dihet nga rezultatet preliminare është se, edhe pse PDK-ja dhe LDK-ja mund të bashkohen, nuk mund të bashkohen ashtu si Lëvizja Vetëvendosje. Rezultatet preliminare kanë treguar diçka shumë të vlefshme dhe të rëndësishme për politikën dhe historinë: populli i Kosovës, më 9 shkurt 2025, ka mundur si Serbinë, ashtu edhe Klan Serbinë”, ka thënë Kurti.

Sipas tij, rezultatet preliminare kanë treguar se Lëvizja Vetëvendosje është fituese e zgjedhjeve.

“Rezultatet preliminare tregojnë diçka të qartë: Lëvizja Vetëvendosje është fituese e zgjedhjeve të 9 shkurtit 2025. Procesi zgjedhor ka qenë i lirë dhe i ndershëm, dhe falënderoj policinë për angazhimin e saj”.

Komisioni Qendror i Zgjedhjeve (KQZ), që nga mbyllja e qendrave të votimit ka pasur problem për të pasur qasje në rezultatet preliminare.

KQZ-ja ka deklaruar se janë duke u mbledhur të dhënat pas numërimit të fletëvotimeve nga vendvotimet.

“Janë evidente problemet teknike në platformë. Të dhënat janë duke u mbledhur nga terreni dhe më pas do të publikohen nga KQZ. Për shkak të interesimit të madh të qytetarëve për t’u qasur në platformën e rezultateve, është shkaktuar mbingarkesë në sistem”.

Nga ky institucion është thënë se të gjitha ekipet janë duke punuar në terren dhe do të dërgojnë të dhënat për të cilat do të bëjnë përpjekje që t’i transmetojmë në kohë sa më të shpejtë.