Kurti: Pa dorëzimin e Radoiçiçit dhe tërheqjen e letrës së Brnabiçit, nuk do të ketë takim me Vuçiçin

Kryeministri në detyrë i Kosovës, Albin Kurti, tha se nuk do të takohet me presidentin serb Aleksandar Vuçiç, pa dorëzimin paraprak të Milan Radoiçiç dhe tërheqjen e letrës drejtuar Brukselit nga ish-kryeministrja serbe Ana Brnabiç.
Lidhur me vendosjen e Forcës së Sigurisë së Kosovës në veri, Kurti theksoi se do të vijë dita për këtë, por në bashkëpunim me NATO-n.
Ai është i bindur se zgjedhjet e parakohshme parlamentare më 7 qershor do të jenë të fundit në Kosovë për këtë vit.
Kurti deklaroi se takimet që pati me udhëheqësit e opozitës ishin të mira dhe se ato u zhvilluan në një atmosferë konstruktive, por se ai ishte i vetmi që bëri propozime për presidentin.
Ai përsëriti se i kishte ofruar pozicionin e zëvendëskryeministrit dhe katër ministri kreut të LDK-së, Lumir Abdixiku, dhe shtoi se problemi nuk qëndronte te propozimet që ai paraqiti, por te refuzimi nga partitë opozitare.
Kurti deklaroi se pret që Levizja Vetëvendosje të fitojë 60 përqind të votave të qytetarëve në zgjedhje dhe sipas tij, opozita nuk e kupton rëndësinë e institucioneve.
Ai deklaroi gjithashtu se presidentja e mëparshme , Vjosa Osmani, dëshiron pushtet dhe ka ambicie politike, gjë që është plotësisht legjitime në një demokraci.
Lidhur me raportin e World Atlas që e renditi Kosovën si më të varfrën në Evropë pas Moldavisë, Kurti tha se progresi në ekonomi në pesë vitet që ai ka qenë në pushtet nuk mund të mohohet.