Lufta/ Irani hap Ngushticën e Hormuzit në këmbim të pagesës

Rritet çmimi i naftës, bie mbështetja për Donald Trump, dhe po bëhen gjithnjë e më të kushtueshme misionet ajrore izraelite: karburanti për avionët luftarakë është dyfishuar në 200 dollarë për fuçi, ndërsa një fluturim vajtje-ardhje drejt Iranit mund të kushtojë 30–40 mijë dollarë për çdo avion. Megjithatë, sulmet e ushtrisë izraelite nuk janë ndalur, ashtu si kanë vazhduar edhe lëshimet e raketave nga Pasdaranët dhe Hezbollahu libanez: për këta aktorë, lufta vazhdon sikur presidenti amerikan të mos kishte shpallur se dëshiron të provojë rrugën e negociatave.

Trump është i bindur se ndërmjetësimi mund të ketë një shans. “Po flasim me njerëzit e duhur”, thotë ai. “Në Iran kemi eliminuar të gjithë liderët, ka një grup të ri, por nuk i besoj askujt”. Bashkëbiseduesi i të dërguarve të tij, Steve Witkoff dhe Jared Kushner (dhëndri i tij), pritet të jetë Mohammad Bagher Ghalibaf, presidenti i parlamentit iranian, megjithëse regjimi lëkundet mes mohimeve dhe konfirmimeve shumë të paqarta për dialogun. Shtëpia e Bardhë thuhet se i ka dërguar Teheranit një plan me 15 pika përmes Pakistanit, që po vepron si ndërmjetës: marrëveshja do të diskutohej gjatë një muaji armëpushim.

Në krye të listës është çmontimi i të gjitha kapaciteteve bërthamore, ndjekur nga ndalimi i mbështetjes për milicitë si Hezbollahu, deri te hapja pa kushte e Ngushticës së Hormuzit. Në këmbim, sanksionet ndaj ajatollahëve do të hiqeshin dhe amerikanët do të ndihmonin në zhvillimin e një programi civil bërthamor.

Presidenti amerikan lë të kuptohet: “Irani na ka bërë një dhuratë shumë të madhe për naftën dhe gazin, janë shumë para, lidhet me Hormuzin. Ata duan marrëveshje”. Teherani i ka dorëzuar Organizatës Ndërkombëtare Detare një letër ku njofton se Hormuzi është i hapur për anijet “jo armiqësore”. Në fakt, disa cisterna nafte kanë rifilluar të kalojnë, duke paguar një tarifë që mund të arrijë deri në 2 milionë dollarë: një përfitim edhe për regjimin. Në çdo rast, Trump tashmë deklaron: “E kemi fituar luftën”. Ai shton se në ndërmjetësim marrin pjesë edhe zëvendëspresidenti JD Vance dhe sekretari i Shtetit Marco Rubio.

Një izraelite është vrarë në veri nga një raketë e lëshuar nga grupi shiit i mbështetur nga ajatollahët; gjashtë persona janë vrarë në Liban nga bombardimet (numri total i viktimave ka kaluar 1 mijë); alarmet janë aktivizuar më shumë se dhjetë herë në Izrael: një predhë ka arritur të depërtojë sistemet e mbrojtjes dhe ka shpërthyer mes ndërtesave në veri të Tel Avivit, duke shkaktuar shkatërrim.

Ushtria izraelite njofton se misionet janë përqendruar në objektet e prodhimit ushtarak në Isfahan, ndërsa është goditur edhe centrali bërthamor në Bushehr. Për herë të parë, një raketë iraniane është drejtuar drejt Libanit dhe është kapur: besohet të jetë hakmarrje pas vendimit të qeverisë në Bejrut për të dëbuar ambasadorin Mohammad Reza Sheibani. Dronë të dërguar nga Pasdaranët kanë goditur gjithashtu Arabinë Saudite, Bahreinin dhe Kuvajtin.

Teherani ende dyshon se lëvizja e Trump mund të jetë një taktikë për të fituar kohë. Benjamin Netanyahu, kryeministri izraelit, duket se e shpreson këtë. Pentagoni po përgatitet të dërgojë rreth 3,200 ushtarë të Divizionit të 82-të Ajror drejt Iranit, me urdhrin e nisjes që pritet së shpejti. Vendet e Gjirit mund të jenë gati të marrin pjesë në operacione ushtarake kundër regjimit, shkruan WSJ, ndërsa New York Times raporton se në javët e fundit Mohammed bin Salman ka ushtruar presion mbi Trump për të vazhduar sulmet. Të gjitha këto sinjale sugjerojnë se lufta mund të zgjasë gjatë. Shtabi i përgjithshëm izraelit përgatitet për të paktën edhe 2–3 javë luftime, ndërsa gjeneralët deklarojnë se fronti me Hezbollahun do të mbetet i hapur. Ministri i Financave Bezalel Smotrich madje kërkon pushtimin e Libanit deri te lumi Litani.

Regjimi islamik po rikonsolidohet pas eliminimit të drejtuesve të tij. Gjenerali Mohammad Bagher Zolghadr është emëruar në krye të Këshillit të Lartë për Sigurinë Kombëtare, në vend të Ali Larijani, i cili mbeti i vrarë në një bombardim.