Lutfi Bilali në “Tik Talk”: Viti 2026 do të jetë vit protestash dhe ndryshimesh politike

I ftuar në emisionin “Tik Talk”, të moderuar nga Grisela Zendeli, analisti Lutfi Bilali komentoi protestën e zhvilluar në Tiranë, duke e cilësuar atë si një sinjal të rëndësishëm politik dhe shoqëror.

Sipas Bilalit, zhvillimet në Shqipëri ndiqen me interes të madh edhe nga shqiptarët e Kosovës dhe Maqedonisë së Veriut, pasi ato prekin interesin e përbashkët kombëtar. Ai tha se proceset politike në Shqipëri janë një shqetësim dhe një interes për çdo shqiptar.

Duke iu referuar protestave që kanë përfshirë rajonin, Bilali u shpreh se viti 2026 pritet të jetë një vit protestash dhe ndryshimesh politike në disa vende të Ballkanit dhe Evropës, duke përmendur edhe Hungarinë si një nga vendet ku mund të ketë zhvillime të rëndësishme politike.

Në lidhje me situatën në Shqipëri, ai argumentoi se qeverisja e gjatë e kryeministrit Edi Rama ka sjellë konsumim politik, ndërsa theksoi se opozita po kërkon zgjedhje të lira dhe të ndershme përmes krijimit të një qeverie tranzitore.

Bilali vlerësoi protestën në Tiranë si paqësore dhe të organizuar, duke nënvizuar se një nga shqetësimet kryesore mbetet menaxhimi i pasurive publike dhe transparenca në investimet strategjike, veçanërisht në zonat bregdetare.

Sipas tij, Shqipëria ka nevojë për investime, por ato duhet të jenë në interes të qytetarëve dhe të shoqërohen me transparencë të plotë. Ai shtoi se pjesëmarrja e të rinjve dhe e shtresës së mesme në protestë tregon një rritje të pakënaqësisë ndaj klasës politike dhe mënyrës së qeverisjes në vend.