MAFIA ARTISTIKE/ CURRI: NE TELEFONA MUND TE KENE EDHE VIDEO ME TE MITUR

Qarkullimi i videove intime në rrjetet sociale dhe mënyra se si ato janë regjistruar e shpërndarë u diskutua në emision, ku analisti Arjan Curri ngriti pretendime të forta për pasojat e këtij fenomeni.

Curri u shpreh se vajzat që shfaqen në videot intime i konsideron viktima, duke argumentuar se pas publikimit të pamjeve mund të fshihet, sipas tij, një formë presioni, intimidimi apo përdorimi të materialeve intime si mjet kontrolli.

“Unë i shikoj ato zonja si viktima”, deklaroi Curri, duke shtuar se, sipas tij, bëhet fjalë për një situatë ku seksi mund të jetë përdorur si instrument pushteti dhe presioni.

Analisti ngriti gjithashtu pyetje për mënyrën se si janë krijuar dhe përdorur këto materiale, duke kërkuar që institucionet e drejtësisë të hetojnë nëse vajzave u janë premtuar favore profesionale, role apo mundësi promovimi në këmbim të marrëdhënieve seksuale.

“Prokuroria duhet të promovojë një nisëm të tillë: a u është premtuar se do të marrin një çmim, a do t’u jepej një këngë, rol, nëse kalojnë nga krevati? Këtu është një gjë shumë serioze”, tha ai.

Curri u ndal edhe te vështirësitë që, sipas tij, mund të përballojnë personat që shfaqen në këto materiale, duke argumentuar se publikimi i videove mund t’i ekspozojë ndaj presionit social dhe t’i detyrojë disa prej tyre të largohen nga Shqipëria.

Më tej, analisti ngriti një tjetër pretendim, duke thënë se dyshon se në pajisjet e personave që kanë regjistruar apo poseduar materiale intime mund të ketë edhe pamje që përfshijnë të mitur.

“Unë dyshoj që në telefonat e këtyre njerëzve që janë autorë pornografikë mund të ketë edhe materiale me të rinjtë. Dyshoj unë. Duhet parandaluar sa është në kohë”, deklaroi Curri.

Ai foli gjithashtu për ekzistencën e pretenduar të materialeve të tjera intime, që sipas tij mund të përfshijnë persona të njohur nga bota e artit.

Në këtë kontekst, Curri përdori edhe shprehjen “mafia artistike”, duke kërkuar që pretendimet të verifikohen nga institucionet përgjegjëse.

Deklaratat e analistit vijnë në një kohë kur publikimi dhe shpërndarja e paautorizuar e materialeve intime ka hapur debate të forta mbi privatësinë, presionin ndaj viktimave dhe përgjegjësinë penale të personave që i regjistrojnë ose i shpërndajnë këto materiale.