Marsela Çibukaj largohet nga “Kënga Magjike”? Dyshohet se kënga ishte e kompozuar nga Adi Hila

Një pretendim i pakonfirmuar ka qarkulluar në rrjetet sociale lidhur me pjesëmarrjen e këngëtares Marsela Çibukaj në edicionin e ri të “Kënga Magjike”.

Pretendimi është bërë nga Elton Tozaj, i cili përmes një postimi në Instagram ka deklaruar se Çibukaj është tërhequr nga gara dhe e ka lidhur këtë vendim me autorin e këngës, kompozitorin Adrian Hila.

Tozaj ka shkruar se Marsela Çibukaj është larguar nga “Kënga Magjike” pasi kënga e saj është kompozuar nga Hila.

Deklarata vjen në një periudhë kur Adrian Hila është përfshirë në një debat publik pas qarkullimit online të videove intime. Për këtë çështje janë raportuar hetime mbi mënyrën e regjistrimit dhe shpërndarjes së materialeve, ndërsa Hila ka mohuar të ketë qenë ai që i ka publikuar.

Marsela Çibukaj ishte përmendur më herët mes artisteve që pritej të merrnin pjesë në edicionin e ri të festivalit, pas rikthimit të saj në “Kënga Magjike”.

Megjithatë, deri në këtë moment, deklarata e Elton Tozajt mbetet e pakonfirmuar zyrtarisht. Nuk ka një reagim publik nga Marsela Çibukaj apo nga produksioni i “Kënga Magjike” që të konfirmojë tërheqjen e këngëtares nga gara dhe as arsyen e pretenduar.