ANETARESIMI NE BE, MARTA KOS JEP SHPRESE

Komisionerja për Zgjerimin në Komisioni Evropian, Marta Kos, ka deklaruar se Shqipëria ka mundësi reale të bëhet pjesë e Bashkimi Evropian deri në vitin 2030 -madje edhe më herët nëse ruan ritmin aktual të reformave.

Duke folur në Këshilli Atlantik, Kos theksoi se në Ballkanin Perëndimor, dy vendet që aktualisht kryesojnë procesin janë Mali i Zi dhe Shqipëria.

“Mali i Zi synon të mbyllë të gjithë kapitujt deri në fund të këtij viti, ndërsa Shqipëria ka shprehur vendosmërinë për të përfunduar negociatat deri në fund të vitit të ardhshëm”, u shpreh ajo.

Anëtarësimi pa data fikse, por me objektiva ambicioze

Kos nënvizoi se procesi i zgjerimit nuk funksionon me afate të paracaktuara, por mhi bazën e performancës së vendeve kandidate.

“Zakonisht nuk caktojmë data, sepse procesi është i bazuar në meritë. Por ne mbështesim objektivat ambicioze të vendeve”, deklaroi ajo, duke shtuar se Shqipëria mund të arrijë anëtarësimin brenda dekadës.

Komisionerja theksoi se vendet anëtare të BE-së janë të vendosura që asnjë kriter të mos anashkalohet. Sipas saj, veçanërisht të rëndësishme mbeten kapitujt themelorë, sundimi i ligjit, lufta kundër korrupsionit, liria e medias, liria e shprehjes.

“BE nuk është një grup miqsh, por një bashkësi vlerash. Çdo vend që kërkon të bëhet pjesë duhet të respektojë këto standarde”, u shpreh Kos.

Paralajmërimi për “kuajt e Trojës”

Në vijim, ajo riktheu një nga shqetësimet kryesore të Brukselit: rrezikun që vende të reja anëtare të përdoren si instrumente ndikimi nga aktorë të jashtëm.

“Duhet të bëjmë gjithçka që të mos kemi ‘kuaj Troje brenda BE-së”, tha Kos, duke paralajmëruar se traktatet e ardhshme të pranimit do të përfshijnë mekanizma mbrojtës për vendet që nuk respektojnë rregullat.

Kos vuri në dukje se procesi i zgjerimit nuk varet vetëm nga vendet kandidate, por edhe nga miratimi i shteteve anëtare. Në disa raste, kjo përfshin referendume kombëtare ose shumica të cilësuara në parlamentet përkatëse.

Në përfundim, ajo shprehu shpresën që në të ardhmen, vendimmarrja për zgjerimin të kalojë më shumë drejt përdorimit të shumicës së kualifikuar, për të shmangur bllokimet politike.

Mesazhi kryesor nga Brukseli mbetet i qartë: Shqipëria ka një dritare reale për anëtarësim brenda kësaj dekade, por gjithçka do të varet nga thellimi i reformave dhe përmbushja e standardeve të BE-së.