“Më rrahu shtatzënë…”/ 23-vjeçarja denoncon ish-partnerin shqiptar

Një 23-vjeçare në Lavrio të Greqisë, nënë e një fëmije dhe në muajin e gjashtë të shtatzënisë, ka denoncuar ish-partnerin e saj 31-vjeçar për dhunë në familje, kërcënime dhe ngacmime të përsëritura.

Sipas dëshmisë së dhënë për mediat greke, gruaja pretendon se gjatë kohës që ishte në lidhje me 31-vjeçarin ka përjetuar episode të dhunës fizike dhe kërcënime për jetën. Ajo deklaron se është goditur me grushte dhe shqelma, është tërhequr nga flokët dhe se një prej episodeve ka ndodhur edhe kur mbante në krahë fëmijën e tyre.

23-vjeçarja pretendon se pas një episodi dhune është dërguar në Qendrën Shëndetësore të Lavrios dhe se është kërcënuar të mos tregonte shkakun e plagëve. Pas ndarjes, ajo thotë se ka bërë kallëzim dhe ndaj ish-partnerit janë vendosur masa kufizuese, mes tyre ndalimi i afrimit në një distancë prej 50 metrash.

Sipas saj, pavarësisht masave të vendosura, telefonatat, kërcënimet dhe ngacmimet kanë vijuar.

Incidenti më i fundit, sipas dëshmisë së 23-vjeçares, ka ndodhur në një kënd lojërash në Lavrio, ku ndodhej edhe fëmija i tyre. Ajo pretendon se ish-partneri është shfaqur i tensionuar, ka bërtitur dhe ka bërë kërcënime, duke alarmuar personat që ndodheshin në zonë. Kalimtarët kanë njoftuar policinë, ndërsa 31-vjeçari është larguar nga vendi.

Sipas raportimeve, autoritetet greke kanë nisur kërkimin e tij pas incidentit.

Gruaja, e cila është shtatzënë me fëmijën e dytë, thotë se situata e vazhdueshme e stresit ka ndikuar në gjendjen e saj gjatë shtatzënisë. Pas incidentit të fundit, ajo pretendon se është dërguar për kontroll urgjent në një spital në Athinë.

“Kam vazhdimisht frikë për jetën time”, është shprehur ajo, duke kërkuar mbrojtje për veten dhe dy fëmijët.

23-vjeçarja pretendon gjithashtu se në vitin 2024, kur kishte kërkuar ndihmë në polici, një efektiv i kishte thënë të “kthehej te burri i saj”. Ky pretendim nuk shoqërohet në material me të dhëna për një hetim apo verifikim zyrtar.

Çështja penale e ngritur pas kallëzimit të saj vijon dhe, sipas raportimit, një seancë gjyqësore është planifikuar për muajin nëntor. Autoritetet pritet të shqyrtojnë pretendimet për dhunë, kërcënime, ngacmime dhe shkelje të masave kufizuese.