“Messi e meriton Topin e Artë, por nëse fiton Spanja do të ndahet mes…”

Sot, 16 vite më vonë, ai sheh një tjetër kombëtare spanjolle shumë pranë të njëjtës ëndërr.

Në një intervistë për AS, Piqué analizoi finalen e madhe të Botërorit 2026 mes Spanjës dhe Argjentinës, duel ku në qendër është edhe miku i tij i vjetër, Lionel Messi.

Piqué pranon se përballja Spanjë-Argjentinë është një nga finalet më të bukura të mundshme.

“Spanja ishte mes favoritëve të mi, bashkë me Francën, Anglinë dhe Brazilin. Argjentinën ndoshta jo aq shumë në fillim, por mënyra si ka rrjedhur turneu na ka sjellë një nga finalet më të mira që mund të shohim”, tha ai.

Sipas tij, kjo finale ka një domethënie të veçantë edhe për dy figura të mëdha të futbollit:

“Për ne mund të jetë ylli i dytë në fanellë, ndërsa për Leon mund të jetë Kupa e Botës e dytë radhazi. Do të ishte një mënyrë perfekte për të kompletuar një karrierë që shumë njerëz mendonin se nuk do ta arrinte më këtë pikë.”

Piqué foli edhe për Lamine Yamal: “Nëse Spanja fiton, Lamine në moshën 19-vjeçare do të jetë në një pozicion unik. Mund të bëhet një nga lojtarët më të rinj që fiton një Botëror.”

I pyetur për formën e jashtëzakonshme të Messit në moshën 39-vjeçare, Piqué nuk u kursye në vlerësime.

“Messi ka shumë cilësi, por një prej tyre është inteligjenca. Ai e di që nuk është më fizikisht si në moshën 25-vjeçare, por di të gjejë pozicionet ku mund të jetë i rrezikshëm.”

Sipas tij, madhështia e argjentinasit nuk është vetëm te goli.

“Ai mund të jetë pranë zonës, të kombinohet me pasime të shkurtra, të dalë në krah dhe të japë krosime fantastike. Natyrisht, është një nga përfunduesit më të mirë brenda zonës.”

Piqué paralajmëroi Spanjën se ndalimi i Messit nuk është një detyrë e thjeshtë.

“Edhe nëse vendos tre lojtarë për ta ndalur, ai do të gjejë një mënyrë. Dhe nëse jo, vëmendja ndaj tij krijon hapësira për shokët e skuadrës. Argjentina nuk është vetëm Messi.”

Një nga temat më të mëdha para finales është edhe gara për Topin e Artë 2026. Piqué mendon se Messi do ta meritonte nëse fiton Botërorin, por pranon se kriteret shpesh janë të diskutueshme.

“Sigurisht që ai e meriton ta fitojë. Do të ishte mënyra më e mirë për të përmbyllur karrierën. Por gjithmonë do të ketë njerëz që do të thonë se duhet të merret parasysh i gjithë sezoni, fakti që luan në MLS.”

Ai përmendi edhe kandidatët e tjerë: “Nëse Spanja fiton, do të ketë diskutime nëse Topi i Artë duhet t’i shkojë Rodrit, edhe pse ka bërë një Botëror shumë të mirë, apo Lamine.”

Për mënyrën si duhet të luajë Spanja ndaj Argjentinës, Piqué është i qartë.

“Argjentina do të kërkojë të vendosë dominimin që në fillim. Është mënyra e tyre e të kuptuarit të futbollit. Spanja duhet të fokusohet vetëm te loja e saj.”

Sipas tij, çelësi është kontrolli i topit.

“Nëse Spanja arrin të kontrollojë posedimin, të luajë me presing të lartë dhe pa frikë, ka më shumë shanse për të fituar. Duhet të jetë më radikale se kurrë në stilin e saj.”

Megjithatë, ai pranon se ekipet amerikano-jugore gjithmonë kanë qenë të vështira për Spanjën.

“Historikisht, Spanja ka pasur më shumë vështirësi ndaj ekipeve të Amerikës së Jugut. Ne jemi një futboll më teknik, nuk na pëlqen shumë kontakti fizik. Në Botërorin 2010 ishte shumë e vështirë të kalonim Paraguain.”

Piqué sheh shumë pika të përbashkëta mes skuadrës aktuale të Luis de la Fuentes dhe kampionëve të vitit 2010.

“Shumë thonë se ekipi i 2010 kishte më shumë aura, por kjo thuhet pas 16 vitesh dhe me avantazhin e historisë. Edhe ne nuk ishim favoritë kur shkuam në Afrikën e Jugut, sidomos pas humbjes ndaj Zvicrës.”

Ai beson se brezi i ri mund të arrijë nivele të mëdha.

“Jam i bindur se kjo skuadër me Pedrin, Laminin, Cubarsin dhe të tjerë mund të jetë po aq e mirë ose edhe më e mirë se ajo e vitit 2010, por u duhet kohë.”

Pavarësisht miqësisë me Messin, Piqué nuk e fsheh dëshirën e tij për triumfin e Spanjës.

“Që kur jam tërhequr, e shoh futbollin ndryshe. Kur luaja, mbroja ekipin tim deri në fund. Tani e shijoj si tifoz. Shpresoj të fitojë Spanja, por nëse fiton Argjentina do të jem i lumtur për Messin.”

Finalja e Botërorit 2026 për Piquén është më shumë se një ndeshje. Njëra anë është Spanja që kërkon yllin e dytë në histori, ndërsa ana tjetër është Messi që mund të shkruajë edhe një kapitull të fundit legjendar në karrierën e tij.