Turqia po ndjek më vëmendje se kush do të zëvendësojë presidentin iranian Ebrahim Raisi, pas vdekjes së tij si pasojë e rënies së helikopterit me të cilin udhëtonte. Siç njofton nga Stambolli korrespondenti i Zërit të Amerikës, Dorian Jones, marrëdhëniet mes dy fuqive rajonale janë në një moment kyç.

Vdekja e presidentit iranian Ebrahim Raisi ndodhi në një moment të rëndësishëm për marrëdhëniet e Turqisë me Iranin. Një dron ushtarak turk ndihmoi për gjetjen e helikopterit të rrëzuar, por analistët thonë se gjeste të tilla të dukshme ndihme bëhen ndërsa në sfond ekziston një rivalitet në rritje mes dy vendeve.

“Konkurenca politike dhe ekonomike vazhdon. Por, kur shohim deklaratat e presidentit turk, ai është shumë i kujdesshëm që të shmangë diskursin negativ strategjik. Madje Turqia mbajti edhe një ditë zie. Asnjë vend tjetër nuk e bëri këtë; as vendet arabe”, thotë Huseyin Bagci, profesor i marrëdhënieve ndërkombëtare në Universitetin Teknik të Lindjes së Mesme, në Ankara.

Turqia mbajti një ditë zie kombëtare për presidentin iranian, duke u përpjekur të fshehë faktin se Ankaraja dhe Teherani po konkurojnë për ndikim në rajone të ndryshme. “Për Turqinë, tashmë e ardhmja e Kaukazit jugor, Irakut dhe Sirisë është shumë jetike për sigurinë e saj kombëtare. Në këto zona, Turqia përballet me Iranin që vepron kundër interesave kombëtare të Turqisë”, thotë Bilgehan Alagoz, profesore e marrëdhënieve ndërkombëtare në Universitetin e Marmarasë, në Stamboll.

Ushtria turke është përgatitur për një ofensivë madhore në Irak dhe Siri ndaj bazave të grupit rebel kurd PKK, që lufton kundër shtetit turk. Ankaraja e ka kritikuar vazhdimisht Teheranin se nuk mbështet përpjekjet e saj.

Me vdekjen e presidentit Raisi, Irani pritet të organizojë zgjedhje të reja presidenciale. Analistët thonë se Ankaraja mund ta shohë këtë si një mundësi për të përmbushur objektivat e saj, në veçanti duke patur parasysh ndasitë e brendshme në Iran.

“Tashmë kemi një luftë për pushtet, që do të vazhdojë. Kryesorët janë ushtria dhe klerikët, që kanë një partneritet mes tyre. Por njëkohësisht edhe luftojnë me njëri-tjetrin”, thotë profesor Bagci.

Analistët thonë se nëse Garda Revolucionare e Iranit rrit pushtetin e saj, kjo mund të sjellë edhe një aktivizim më të lartë të grupeve të mbështetura nga Irani në Irak dhe Siri, të cilat shpesh sfidojnë interesat e Turqisë. Kjo do të nxiste më tej rivalitetin mes Turqisë dhe Iranit.

“Një vetëbesim i shtuar nga Garda Revolucionare, i kombinuar me pushtetin politik, do të jetë një faktor paqëndrueshmërie në Lindjen e Mesme. Prandaj Turqia do ta trajtojë këtë çështje me shqetësim”, thotë profesorja Alagoz.

Ndërsa Ankaraja dhe Teherani konkurojnë për influencë në Siri, Irak dhe Sudan, analistët thonë se tranzicioni në Iran drejt një presidenti të ri mund të ketë pasoja të rëndësishme për mbarë rajonin./Voa/

Sirena që paralajmërojnë sulme me raketa u dëgjuan në pjesën qendrore të Izraelit, përfshirë Tel Avivin më 26 maj, për herë të parë pas disa muajsh, teksa Hamasi – grupi palestinez i shpallur organizatë terroriste nga Shtetet e Bashkuara dhe Bashkimi Evropian – tha se ka gjuajtur një breshëri raketash nga Gaza.

Hamasi ka vazhduar të sulmojë me raketa komunitetet përreth Gazës, që kur ka nisur luftën me Izraelin më 7 tetor. Nuk ka ende informacione për viktima apo dëme nga breshëria e fundit e raketa e lëshuar nga Hamasi.

Lufta në Gazë mes Izraelit dhe Hamasit nisi pasi grupi radikal palestinez sulmoi jugun e Izraelit më 7 tetor, duke vrarë 1.200 persona dhe duke rrëmbyer 250 të tjerë.

Si pasojë e ofensivës izraelite, në Gazë janë vrarë më shumë se 35.800 palestinezë. Izraeli thotë se po zhvillon ofensivë në Gazë me synimin që të zhdukë Hamasin, i cili udhëheq këtë territor./Rel/

Mbrëmjen e djeshme, një ngjarje tragjike ka ndodhur në Nju Delhi të Indisë, ku gjashtë foshnje të porsalindura kanë humbur jetën, si pasoje e një zjarri që shpërtheu në një spital të kryeqytetit Indian.

Në pamjet e transmetuara nga rrjetet televizive, shihen zjarrfikësit duke tentuar të shuajnë zjarrin, i cili ra mbrëmë në spitalin në pjesën lindore të qytetit.

Departamenti i zjarrfikësve, i tha agjencisë së lajmeve ANI se gjashtë fëmijë të tjerë u shpëtuan dhe u dërguan në një spital tjetër.

Policia indiane bën me dije se pronari i spitalit është zhdukur. Shkaku i zjarrit është duke u hetuar dhe përgjegjësit do të mbajnë përgjegjësi, tha një zyrtar lokal.

Zjarri shpërtheu një ditë pasi 27 persona, humbën jetën në një zjarr në një park në shtetin perëndimor të Gujarat.

Mediat lokale raportojnë se për këtë incident janë arrestuar dy persona.

Një ngjarje e rëndë ka ndodhur ditën e djeshme në Itali, ku bashkëshorti i eurodeputetes kristiandemokrate në Itali Francesca Donato është gjetur pa shenja jete brenda automjetit të tij tip “Range Rover”.

Ka qenë eurodeputetja ajo që ka vënë alarmin pasi bashkëshorti i saj Angelo Onorato nuk po i përgjigjej telefonave, dhe pas lokalizimit me GPS të makinës së tij, ka njoftuar autoritetet.

Mediat italiane raportojnë se Onorato, një arkitekt dhe pronar i një dyqani mobiliesh, u gjet me një shirit plastik në qafë të shtrënguar fort dhe me njolla gjaku në këmishë.

Autoritetet janë duke hetuar në dy pista, vrasje dhe vetëvrasje.

Mediat italiane raportojnë se avokati i viktimës ka dorëzuar në polici një letër të cilën klienti i tij ia kishte lënë në dorëzim kohë më parë.

“Nëse ndodh diçka, dërgoja këtë letër gruas sime”, kështu mësohet të ketë cituat avokati, viktimën.

Izraeli vazhdoi edhe këtë të shtunë sulmet në Rripin e Gazës, duke përfshirë qytetin Rafah, një ditë pasi Gjykata Ndërkombëtare e Drejtësisë e urdhëroi të ndalonte operacionet ushtarake në qytetin jugor. Ndërkohë, sipas agjencisë Reuters, javën tjetër pritet që Izraeli dhe grupi Hamas të rinisin bisedimet për armëpushim.

Negociatat ndërmjet Izraelit dhe grupit militant Hamas për armëpushim dhe për lirimin e pengjeve izraelitë të mbajtur në Rripin e Gazës do të rifillojnë javën e ardhshme, tha të shtunën një zyrtar që kishte njohuri për këtë çështje.

Vendimi për të rifilluar bisedimet, tha zyrtari për agjencinë e lajmeve Reuters, erdhi pasi kreu i agjencisë së inteligjencës izraelite “Mossad” u takua me kreun e CIA-s dhe kryeministrin e Katarit, vend i cili prej kohësh ka luajtur rolin e ndërmjetësit.

“Në fund të takimit, u vendos që në javën e ardhshme të hapen negociatat bazuar në propozimet e reja të udhëhequra nga ndërmjetësit, Egjipti dhe Katari dhe me përfshirjen aktive të SHBA-së”, tha zyrtari i cili për shkak të ndjershmërisë së çështjes nuk pranoi të identifikohej.

Të premten, presidenti francez Emmanuel Macron priti kryeministrin e Katarit dhe ministrat e jashtëm saudit, egjiptian dhe jordanez për të diskutuar për një armëpushim mes Izraelit dhe grupit militant Hamas. Presidenca franceze tha se ata zhvilluan bisedime mbi luftën në Gazë dhe mënyrat për të krijuar një shtet palestinez përkrah Izraelit.

Ndërkohë Izraeli sulmoi Rripin e Gazës të shtunën, duke përfshirë qytetin Rafah, një ditë pasi Gjykata Ndërkombëtare e Drejtësisë e urdhëroi të ndalonte operacionet ushtarake në qytetin jugor.

Gjykata Ndërkombëtare e Drejtësisë gjithashtu kërkoi lirimin e menjëhershëm të të gjithë pengjeve që mbahen nga militantët palestinezë, disa orë pasi ushtria izraelite njoftoi se forcat e saj kishin gjetur trupat e tre pengjeve në veri të Gazës.

Gjykata me bazë në Hagë urdhëroi gjithashtu Izraelin të mbajë të hapur kalimin kufitar në Rafah midis Egjiptit dhe Gazës, të cilin e mbylli në fillim të këtij muaji pasi njoftoi ofensivën ndaj qytetit. Gjykata Ndërkombëtare e Drejtësisë, që njihet edhe si Gjykata Botërore, është organi më i lartë ligjor i Kombeve të Bashkuara, për të trajtuar mosmarrëveshjet midis shteteve. Vendimet e saj janë përfundimatare, por në të shkuarën nuk janë zbatuar. Gjykata nuk ka fuqi detyruese.

Egjipti tha të premten se ka rënë dakord të dërgojë kamionë me ndihma humanitare të Kombeve të Bashkuara në Gazë, përmes pikëkalimit në Kerem Shalom, por është ende e paqartë nëse kamionët do të jenë në gjendje të hyjnë në territor ndërsa luftimet vijojnë

Izraeli thotë se kalimi kufitar në Rafah është rihapur dhe i ka kërkuar Egjiptit që të koordinohet me të për dërgimin e autokolonave të ndihmave. Më herët Kajro nuk e kishte pranuar këtë kushtëzim. Pas një bisede telefonike me presidentin amerikan Joe Biden, presidenti egjiptian Abdel Fattah el-Sissi ra dakord të lejojë kamionët e OKB-së që transportonin ndihma humanitare të shkojnë në vendkalimin Kerem Shalom derisa të gjendet një zgjidhje për pikëkalimin në Rafah.

Por ekspertët thonë se është e paqartë nëse OKB-ja do të jetë në gjendje të dërgojë në territorin e Gazës kamionë shtesë që vijnë nga Egjipti.

Udhëheqësit izraelitë kanë thënë se do të vijojnë sulmet në Rafah, pasi sipas tyre duhet të çrrënjohet Hamasi nga ky qytet.

Militantët e udhëhequr nga Hamasi vranë rreth 1200 njerëz, kryesisht civilë, dhe rrëmbyen rreth 250 të tjerë në sulmin e 7 tetorit në Izrael, sipas të dhënave izraelite. Rreth gjysma e pengjeve janë liruar, shumica në shkëmbime me të burgosurit palestinezë të mbajtur nga Izraeli gjatë një armëpushimi njëjavor në nëntor.

Fushata e bombardimeve dhe ofensiva e Izraelit në Gazë ka vrarë më shumë se 35 mijë palestinezë dhe ka plagosur më shumë se 80 mijë të tjerë tha të premten Ministria e Shëndetësisë në Gazë që kontrollohet nga Hamasi.