MISTERI I MADH/ Shqiptarët janë racë jashtëtokësore, teoria ‘GALAKSIA X’ që po bën xhiron e rrjetit

Një teori e pazakontë mbi origjinën e njerëzimit dhe shqiptarëve ka tërhequr vëmendje, pasi pretendon se racat njerëzore kanë ardhur nga planete të ndryshme dhe se gjurmët e tyre jashtëtokësore ruhen ende në ADN-në e njeriut.

Deklaratat janë bërë nga Amadea Stefa, e prezantuar si mësuese e vetëshërimit dhe Ambasadore e Paqes në Austri, gjatë një interviste për emisionin “Live From Tirana”.

Stefa deklaroi se beson në ekzistencën e jashtëtokësorëve dhe se, sipas bindjeve të saj, ata kanë qenë në Tokë prej miliarda vitesh.

Sipas teorisë së saj, njerëzimi nuk do të kishte një origjinë të vetme. Përkundrazi, grupe të ndryshme njerëzish do të kishin ardhur nga planetë të ndryshëm, ndërsa karakteristikat fizike, përfshirë ngjyrën e syve, do të lidhen me origjinën e tyre planetare.

Ajo përmendi Venusin, Marsin dhe Jupiterin si disa prej planetëve që, sipas saj, lidhen me racat njerëzore.

Por pretendimi më i pazakontë lidhet me shqiptarët.

“Shqiptarët nuk vijnë nga sistemi ynë diellor”

Sipas Stefës, shqiptarët nuk kanë ardhur nga ndonjë planet i sistemit tonë diellor, por nga një planet që ndodhet në një galaktikë tjetër.

Ajo e emërton këtë origjinë si “Iliricum”, duke e lidhur me shqiptarët dhe trashëgiminë ilire.

Në intervistë ajo pretendoi se shqiptarët janë një “racë” me origjinë jashtëtokësore dhe se njerëzit kanë ruajtur në materialin e tyre gjenetik gjurmë të qenieve nga të cilat, sipas saj, kanë ardhur.

“Alienët bashkëpunojnë me shtetet”

Teoria nuk ndalet vetëm te origjina e njerëzimit.

Stefa pretendoi gjithashtu se jashtëtokësorët kanë kontakte me qeveritë dhe politikën dhe se liderë të fuqishëm në botë janë në dijeni të ekzistencës së tyre, por informacioni mbahet i fshehtë.

Këto deklarata mbeten pretendime personale dhe nuk përbëjnë prova shkencore. Shkenca moderne nuk ka prova se racat njerëzore kanë ardhur nga planetë të ndryshëm apo se shqiptarët kanë origjinë jashtëtokësore.

Megjithatë, teoria ka hapur një tjetër kapitull në debatin e pafund mbi alienët, origjinën e njerëzimit dhe pyetjen që vazhdon të intrigojë njerëzit: a jemi vërtet vetëm në univers?