“Na kanë fyer dhe sulmuar fizikisht”/ PS kërkon përjashtimin e deputetëve të PD (EMRAT)

Partia Socialiste ka kërkuar përjashtimin nga punimet e Kuvendit për 60 ditë të gjashtë deputetëve të Partisë Demokratike: Flamur Nokës, Belind Këlliçit, Fidel Krekës, Luçiano Boçit, Edi Palokës dhe Besart Xhaferrit. Kërkesa vjen pas tensioneve dhe përplasjeve të regjistruara gjatë seancës plenare të 22 tetorit 2026.

Po ashtu, socialistët kanë kërkuar përjashtimin me 10 ditë të 14 deputetëve të tjerë të opozitës: Gjin Gjonit, Bardh Spahisë, Albana Vokshit, Elda Hotit, Xhelal Mziut, Gent Strazimirit, Enno Bozdos, Kastriot Pirolit, Kliti Hotit, Flamur Hoxhës, Arjan Ndojës, Ivi Kasos, Zija Ismailit dhe Blendi Himçit.

Në kërkesën drejtuar Kryetarit të Kuvendit dhe Sekretariatit për Procedurat, Votimet dhe Etikën, deputetët e PS-së pretendojnë se gjatë seancës u regjistruan incidente të rënda, me fyerje, bllokim të foltores dhe sulme fizike ndaj deputetëve të mazhorancës.

Sipas pretendimeve të socialistëve, Flamur Noka goditi foltoren dhe dëmtoi mikrofonin, ndërsa Belind Këlliçi, pasi bllokoi foltoren, dëmtoi pajisjet e saj dhe i përdori për të goditur foltoren. Në kërkesë pretendohet gjithashtu se Noka hodhi shishe uji në drejtim të deputetëve socialistë, ndërsa disa deputetë të tjerë të opozitës morën pjesë në bllokimin e foltores gjatë votimit të kalendarit dhe programit të punimeve të Kuvendit.

Socialistët argumentojnë se këto veprime përbëjnë shkelje të rënda të etikës dhe disiplinës parlamentare, duke penguar zhvillimin normal të seancës. Për këtë arsye, ata kërkojnë masa disiplinore të ndryshme sipas deputetëve të përfshirë.

Kërkesa tashmë është paraqitur për shqyrtim, ndërsa masat e propozuara duhet të kalojnë në procedurën përkatëse parlamentare. Deri në marrjen e një vendimi, përjashtimet e kërkuara mbeten propozime të Partisë Socialiste.