Netanyahu ashpërson tonet ndaj Iranit: S’do të lejojmë që të pajiset me armë bërthamore

Kryeministri izraelit Benjamin Netanyahu ka riafirmuar angazhimin e Izraelit për të penguar Iranin të zhvillojë armë bërthamore, duke e cilësuar një skenar të tillë si një kërcënim serioz për sigurinë e vendit.

Teksa ka folur në konferencën e qeverisjes vendore “Muni Expo” në Tel Aviv, Netanyahu deklaroi se qeveria e tij mbetet e vendosur për të ndaluar Teheranin të bëhet një shtet i armatosur bërthamor.

“Pajisja e Iranit me një armë bërthamore do të përbënte një rrezik ekzistencial për Izraelin dhe ne jemi të vendosur ta parandalojmë këtë”, tha Netanyahu.

Kryeministri izraelit theksoi se Izraeli ka ndërmarrë një sërë operacionesh brenda Iranit dhe se përpjekjet për të frenuar programin bërthamor iranian do të vazhdojnë.

Izraeli dhe Shtetet e Bashkuara kanë pohuar prej vitesh se Irani është pranë sigurimit të kapaciteteve për prodhimin e armëve bërthamore, ndërsa autoritetet iraniane i kanë mohuar vazhdimisht këto akuza, duke deklaruar se programi i tyre bërthamor ka qëllime paqësore.

Netanyahu komentoi edhe situatën në kufirin verior të Izraelit, duke theksuar se objektivat ushtarake në Liban nuk janë përmbushur ende plotësisht.

“Objektivat tona në Liban nuk janë ende të plota”, deklaroi ai, duke shtuar se Izraeli po punon për krijimin e një zone tampon sigurie në jug të Libanit për të parandaluar sulme të mundshme nga Hezbollah përtej kufirit.