Një sinjal i ri nga SPAK/ A po rikthehet besimi te Policia e Shtetit?

Arrestimi i Ergys Agasit nuk duhet lexuar vetëm për emrin që përfundoi në pranga.

Në komunikimin për operacionin ka një element që meriton vëmendje: bashkëpunimi mes SPAK, BKH-së dhe strukturave operacionale të Policisë së Shtetit.

Operacioni u finalizua pas një pune disa javore të zhvilluar në bashkëpunim mes strukturave, ndërsa nga SPAK u përcoll edhe një falënderim publik për Policinë e Shtetit për kontributin në realizimin e tij.

Në pamje të parë mund të duket një formulim institucional.

Në realitet, në hetimet ndaj krimit të organizuar dhe korrupsionit, besimi mes institucioneve është një prej elementëve më të rëndësishëm të operacionit.

Një hetim mund të zgjasë me muaj. Mund të ketë ndjekje, përgjime, lokalizime dhe informacione sensitive.

Por kur operacioni kalon nga dosja në terren, mjafton një rrjedhje informacioni që personi i kërkuar të largohet dhe puna hetimore të komprometohet.

Pikërisht këtu rasti Agasi merr një kuptim tjetër.

Nëse strukturat kanë punuar për javë të tëra së bashku dhe operacioni është finalizuar pa u dekonspiruar, atëherë kemi të paktën një tregues konkret të funksionimit të koordinimit operacional.

A PO NDËRTOHET NJË BESIM I RI?

Nga një arrestim i vetëm nuk mund të konkludohet se çdo problem mes institucioneve është zgjidhur.

Por as sinjali nuk duhet anashkaluar.

BKH mund të zhvillojë hetimin dhe SPAK të drejtojë procedimin penal, por në shumë raste është Policia e Shtetit ajo që ka strukturat, njerëzit dhe shtrirjen territoriale për të lokalizuar dhe kapur personat e kërkuar.

Nëse këto hallka nuk i besojnë njëra-tjetrës, sistemi dobësohet.

Nëse informacioni ndahet, ruhet dhe përdoret vetëm në momentin e duhur, sistemi fillon të funksionojë.

Dhe pikërisht për këtë arsye falënderimi publik ndaj Policisë së Shtetit ka peshë më të madhe sesa një fjali protokollare.

PROVA E VËRTETË VJEN TANI

Rasti Agasi mund të jetë një sinjal pozitiv.

Por prova nuk do të jetë një arrestim.

Do të jetë vazhdimësia.

A do të shohim operacione të tjera ku personat në kërkim lokalizohen?

A do të ruhet informacioni deri në momentin e ndërhyrjes?

A do të finalizohen hetimet e SPAK dhe BKH-së në terren pa dekonspirim?

Sepse Shqipërisë nuk i duhet vetëm një SPAK i fortë.

Nuk i duhet vetëm një BKH profesionale.

Dhe nuk i duhet vetëm një Polici e aftë operacionalisht.

I DUHEN TË TREJA QË T’I BESOJNË NJËRA-TJETRËS.

Nëse rasti Agasi shënon forcimin e këtij bashkëpunimi, atëherë rëndësia e tij shkon shumë përtej arrestimit të një personi.

Sepse kundër krimit të organizuar, një nga armët më të rëndësishme të shtetit nuk është vetëm hetimi.

ËSHTË BESIMI MES INSTITUCIONEVE.