Një viking për Juventusin/ Spalleti ndez merkaton, telefonon sulmuesin norvegjez

Trajneri i Juventus-it, Luciano Spalletti, thuhet se ka zhvilluar bisedime personale me Alexander Sorloth, ndërsa Bayern Munich-u i ka paralajmëruar bardhezinjtë se nuk do ta shesin Kim Min-jae për më pak se 40 milionë euro.
Juventus-i po bën përparim në ndjekjen e sulmuesit të Atletico Madrid-it, Sorloth. Sipas “Sky Sport Italia”, drejtorët bardhezi kanë zhvilluar tashmë bisedime me kampin e norvegjezit, ndërsa trajneri Spalletti ka folur drejtpërdrejt me 30-vjeçarin.
Si “Gazzetta dello Sport” ashtu edhe “Sky Sport” pretendojnë se Atletico Madrid-i është i hapur për të diskutuar një transferim të mundshëm për Sorloth, veçanërisht sepse ata duan ta bëjnë të përhershëm transferimin e Nico Gonzalez nga Juventus-i, por për një tarifë transferimi më të ulët se 32 milionë eurot e dakorduara verën e kaluar.
Juventus-i po kërkon gjithashtu përforcime në mbrojtje dhe sipas raporteve, Kim i Bayern Munich-ut është një nga objektivat e tyre kryesorë.
Ish-qendërmbrojtësi i Napoli-t, i cili do të ribashkohej me Spalletti-n pasi fitoi Scudetto-n me Napoli-n në sezonin 2022-23, tashmë i ka dhënë dritën jeshile një transferimi të mundshëm në stadiumin “Allianz”, por çmimi i kërkuar nga Bayern-i aktualisht është 40 milionë euro.
Juventus-i shpreson që kërkesat e Bayern-it do të ulen në javët në vijim, veçanërisht sepse 29-vjeçari nuk ka qenë titullar i rregullt në “Allianz Arena” në sezonin 2025-26.