Patriarku i Jerusalemit pret Ramën dhe vlerëson dialogun ndërfetar në Shqipëri

Fortlumturia e Tij Teofili III, Patriarku i Jerusalemit, priti të martën, më 27 janar, Kryeministrin e Shqipërisë, Edi Rama, së bashku me bashkëshorten e tij Lindën, në
selinë e Patriarkanës së Jerusalemit.
Takimi u zhvillua në kuadër të një turi rajonal të kryeministrit shqiptar në Jerusalem, ku pati edhe një adresim për Knessetin.
Gjatë takimit, Patriarku Teofili III i uroi mirëseardhjen Kryeministrit Rama dhe vuri në dukje marrëdhëniet e hershme dhe të qëndrueshme mes Patriarkanës së Jerusalemit dhe Shqipërisë.
Ai theksoi rolin e Kishës Orthodhokse të Shqipërisë në historinë moderne të Evropës Lindore, duke përmendur veçanërisht kontributin e të ndjerit Kryepeshkop Anastas në rindërtimin e Kishës pas rënies së komunizmit. Patriarku kujtoi se Kryepeshkopi Anastas kishte shërbyer më herët edhe në Jerusalem.

Patriarku Teofili III foli gjithashtu për rëndësinë e dialogut ndërfetar dhe rolin e institucioneve fetare në uljen e tensioneve përmes komunikimit të hapur dhe respektit të ndërsjellë, duke rikonfirmuar angazhimin e Patriarkanës për dialog të balancuar dhe për ruajtjen e pranisë autoktone të krishterë në Tokën e Shenjtë.
Nga ana e tij, kryeministri Rama e falënderoi për pritjen dhe e cilësoi takimin si simbolik dhe me rëndësi historike, duke nënvizuar lidhjet e vjetra kishtare mes dy palëve. Ai theksoi se Shqipëria do të vijojë të promovojë dialogun fetar dhe kulturor në nivel ndërkombëtar.
Në përfundim të takimit, Patriarku Teofili III e dekoroi Kryeministrin Rama me Kryqin e Varrit të Shenjtë, në shenjë vlerësimi për angazhimin e Shqipërisë në nismat e dialogut rajonal.
Gjatë vizitës në Jerusalem, Kryeministri Rama, i shoqëruar nga bashkëshortja dhe delegacioni, vizitoi edhe Kishën e Varrit të Shenjtë, ku u prit nga Fortlumturia e Tij, Kryepeshkopi Isidor i Hierapolisit.