Protesta/ Tabaku flet çfarë do, por s’komenton qëndrimet e ndryshme të kolegëve të saj demokratë

Jorida Tabaku, deputete që ka kundërshtuar në vijimësi në Kuvend ligjin për investimet strategjike, atë për zonat e mbrojtura e nisma të tjera të qeverisë që i kanë hapur rrugë investimeve në bregdet apo zona të mbrojtura, i tha BIRN-it se as ajo dhe as PD nuk është kundër protestës, por se e mbështesin atë.
“Që në ditën e parë të protestës kam parë aty shumë demokratë, anëtarë të strukturave të Partisë Demokratike dhe njerëz që përbëjnë bazën e saj. Kam takuar gjithashtu qytetarë me bindje të ndryshme politike, të djathtë, ambientalistë, të majtë të zhgënjyer, mes të cilëve edhe njerëz që më kanë votuar personalisht,” tha ajo.
Ndërsa nuk pranoi që të komentojë qëndrimet e ndryshme të kolegëve të saj demokratë, Tabaku komenton protestën si një frymë qytetare që nuk i përket asnjë force politike por që ‘pasqyron një pakënaqësi që shkon përtej kufijve partiakë’ dhe që e bashkon “kundërshtimi ndaj sistemit politik dhe ekonomik që po varfëron vendin dhe po përjashton shumicën e shqiptarëve”.
Tabaku e konsideron protestën si legjitime dhe kundër një sistemi kundër mënyrës se si është qeverisur Shqipëria gjatë këtyre 13 viteve. “Dhe kur qytetarët kërkojnë ndryshim, opozita nuk mund të jetë kundër tyre; ajo duhet të jetë pjesë e kësaj beteje për ta ndryshuar këtë sistem”- përfundoi ajo.