Rrezik përmbytjesh në Vlorë, reshje të dendura shiu përfshijnë qytetin bregdetar

Vlora është përfshirë sërish nga reshje të dendura shiu, të cilat po bien me intensitet të lartë prej disa minutash. Qyteti bregdetar, i njohur për problematikat e përmbytjeve në çdo stinë të lagësht, po monitorohet nga afër nga strukturat e emergjencës.

Deri më tani nuk raportohet për rrugë të bllokuara apo përmbytje në lagje, por ekspertët e terrenit paralajmërojnë se, nëse reshjet vazhdojnë me këtë ritëm, disa zona të ulëta të qytetit rrezikojnë të përmbyten.

Autoritetet vendore kanë vënë në gatishmëri ekipet e emergjencës dhe mjetet e ndërhyrjes, për të reaguar menjëherë në rast se situata përkeqësohet.

Kujtojmë se vitet e fundit Vlora është goditur disa herë nga përmbytje masive, duke nxjerrë zbuluar mungesën e investimeve serioze në sistemin e kanalizimeve dhe menaxhimin e ujërave.